KN Ferraren booters misakmit duha ka titulo sa Victory Cup
CEBU, Philippines - Mihakot og duha ka daog ang KN Ferraren sa Victory Cup 2013 football tournament niadtong Domingo didto sa Sta. Lucia field sa Consolacion.
Ang KN Ferraren maoy mipatigbabaw sa laing 24 ka kontender aron maghari sa men's open ug sa men's 38- above category.
Si Chavey Recaplaza maoy bida sa kadaugan sa KN Ferraren batok sa San Roque Rehab, 2-0 sa ilang men's open final. Gumikan sa iyang salida, siya ang nakadawat sa pasidungog isip Most Valuable Player (MVP).
Ang KN Ferraren ni team owner Engr. Nilo Ferraren, milangkat sab sa men's 38-above title human nila gipilde ang Hiroshi.
Sa laing bahin, ang University of San Carlos-Basic Education mihipos og duha ka titulo pinaagi sa under-11 ug under-13 divisions.
Nadaog sa USC-BED A ang under-11 title human nila gidemolis ang Tabor Hills B, 1-0, samtang ang ilang team B nanghawod sa under-13 division human gisirohan ang Suba-Basbas, 2-0.
Ang Sacred Heart School-Ateneo de Cebu (SHS-AdC) ug Subangdaku FC nidaog sab og titulo matag usa.
Ang SHS-AdC naghari sa boys 15 human gipilde ang Frasec, 3-0, samtang ang Subangdaku FC mipilde sa
Leylam, 1-0 aron maghari sa boys 17 class. (BANAT PALARO)
- Latest
