CCPO mipatapsing batok Cebu media

CEBU, Philippines - Nahimong mabulokon ang pagsaulog sa Police Community Relations Month sa Cebu City Police Office human sa malampusong friendly basketball match tali sa mga sakop sa Criminal Investigation Bureau ug sa mga sakop sa Defense PNP Press Corps (DEPP) ug piniling sakop sa ubang beats sa mga media.

Sa maong duwa, naka-ipsot ang CCPO dihang igo lang kining nakatapsing sa mga sakop sa DEPP pinangulohan sa presidetne nga si Chito Aragon sa iskor, 109-108 didto sa CCPO  open court kaniadtong Sabado sa gabii.

Ang koponan sa CCPO gipangulohan ni Chief Insp. Romeo Santander kinsa miburak og 22 puntos nga naglakip sa tulo ka three-pointer ug usa ka free throw. 

Matawag og “outnumbered” apan dili “outgunned”  ang Cebu mediamen apan naglisod sila sa pagkuha sa tempo sa duwa hinungdan nga nabiyaan sila og dos puntos atol sa halftime sa iskor, 35-33.

Sikit ang sunod nga ikatulong quarter apan naka-rally ang media men apan dali kining nabawi tungod sa mga nagsunod nga bomba nga gibuhian ni Santander gikan sa three-point marker pagsulod sa fourth period ug napugngan ang mediamen sa 21 lang ka puntos samtang ang kapolisan miposte og 25 puntos.

Nakita sa maong duwa nga mas dunay teamwork ang CCPO kung itandi sa DEPP ug usa sa nakapalig-on sa ilang line-up mao ang kanhi sentro sa University of Cebu Webmaster ang 6-3 nga si Miguelito Ducay.

Ang koponan usab sa mga mediamen gitimon ni Jojo Satuita nakatampo og 31 puntos ug ni Noel Sanico kinsa nakaangkon og injury didto sa fourth period apan miamot og 12 puntos gikan sa second  quarter.

Ang pwersa sa media men gisuportahan sa duha ka mga ‘import’ niini gikan sa PNP Regional Crime Laboratory nga sila si Jailben Las ug Juneson Eriarte kinsa mihipos usab og 22 puntos ug 10 puntos.

“This friendship game is to poster camaraderie among media men and the police,” matud pa ni Sr. Supt. Mariano Natuel Jr., director sa Cebu City Police Office.

Si Aragon sa iyang bahin miingon nga pagpalig-on sa relasyon sa mga sakop sa media ug sa kapolisan ang maong duwa nga pahaom sa selebrasyon karong bulana.

“In consonance to the Police Community Relations Month, mao nga atong gihimo ning friendly match aron maayo ang atong relasyon with the police isip partners in our work,” matud pang Aragon.

Adunay giplanohang laing exhibition game tali sa CCPO ug sa Newsmen’s Basketball Association of Cebu (NBA-C) selections human unya sa championship match tali sa GMA -7 ug sa The Freeman-CDN Red Shamans sa sunod semana.

Puntos matag usa: 

CCPO  (109)— Santander 22, Taborada 15, Damaolao 14, Ducay 11, Canay 8, Villahermosa 8, Soquib 7, Molina 7, Baquiler 6, Aalicaba 6, Miranda 3, Sanchez 2.

MEDIAMEN (DEPP) 108— Satuita 31, Las 22, Sanico 12, Cerojano 11, Eriarte 10, Melecio 9, Escalante 7,  Aragon 2, Libina 2, Ducay 2.