FYA kampyon sa CIPU 2nd season

CEBU, Philippines - Gipukan sa F. Llamas Youth Association (FYA) Selection ang Petracorta Brokers sa iskor, 93-85 aron sakmiton ang korona sa 2nd season sa Cebu International Port Users (CIPU) basketball tournament kaniadtong Sabado didto sa barangay Cogon-Ramos gym, ning dakbayan.

Miwadwad si Janus Abellana ug 21 puntos samtang misuporta kaniya silang Nico Laborte ug ang managsoong Noel ug Baeng Medalle kinsa pulos mibahug og double figures.

Silang Medalle, Tata ug Nico Laborte, Abellanna, Shaun Cal ug Junrey Arreglo bag-o lang sab nagsaulog og laing kampyonato duha lang ka adlaw ang milabay sa laing torneyo dihang ang ilang MJDL Titans midaug batok sa CIPU Warships aron modaug sa titulo sa bag-o lang natapos nga Cebu Customs Invitational basketball tournament kaniadtong Huwebes sa gabii didto sa USC North Campus gym sa Gen. Maxilom avenue, ning dakbayan.

Dako kaayo'g epekto ang pagkawagtang sa beteranong sentro sa Petracorta nga si Takloy Moral kinsa wala makaduwa tungod sa iyang pulled muscle nga nasinati dihang nagbagat sila sa mao gihapong mga karibal nga nagsul-ob lang og lain na sab nga uniporme.

Miposa og 17 puntos si Nico Laborte ug parehong midugang og 12 puntos matag usa silang Noel ug Baeng Medalle.

Si Francis Palero maoy nangu sa Petracorta sa iyang 21 puntos apan tataw nga ang pagkawagtang ni Moral naghatag nilang kalisod aron pakgangon unta ang FYA.

Sa sayo pa, midaug ang Canillas Brokers (Yoryoj) ni team owner Roy Canillas batok sa Ynah Brokers sa iskor, 87-82 aron maangkon ang ikatulong pwesto. Wala gihapon makaduwa alang sa defending champion Canillas ang ilang sinaligan nga si Kenneth Kern Sesante tungod kay nagkadungan kini sa skedyul sa 10th IBP Season basketball tournament.

    Mibagnos og 22 puntos si Rex Bensi aron pangulohan ang Canillas samtang sila si Jim Villay ug Ferdie Sigue mikadlit og 15 ug 13 puntos matag usa.

    Puntos matag usa:

    First Game (for 3rd place)

    Canillas (Yoryoj) 87—Bensi 22, Villa 15, Sigue 13, Generalao 10, Manlosa 8, Belarmino 4, diano 2, Dela Cearna 1

Ynah Brokers (82)—  Tecson 16, Amistoso 14, Guardiano 13, Villarin 10, Ju. Garcia 7, Peras 7, Oporto 6, Je. Garcia 6,Carmen 2

Second Game:

FYA (93) — Abellana 21, N. Laborte 17, N., Medalle 12, B. Medalle 12, Cal 9, T. Laborte 8, Arreglo 7, Marata 3, Gornez 2,Divinagracia 2.

Petracorta (85)—  Palero 21, Pepito 13, Sagario 10, Cabaltera 6, N. Petracorta 5, Villanronza 5, J. Petracorta 4, Petracorta 2, Solidaios 2, Sagarimo 1.