2013 asturias fiesta cup andam na
CEBU, Philippines - Andam na ang tanan alang sa pagpahigayon sa 2013 Asturias Town Fiesta Invitational Basketball Tournament nga sugdan sa Hulyo 20 didto sa Asturias covered court.
Unom ka mga dekalibreng koponan uban ang ilang tagsa-tagsa ka imports ang mopakita'g aksiyon ning tinuig nga liga nga usa sa mga daku nga kalihukan sa pangilin sa ilang mahal nga patron Señor San Roque sa Agosto 16, 2013.
Naglakip kini sa Tuburan ni Mayor Democrito 'Aljun' Diamante ug Cogon-Tuburan Brgy. Capt. Wilfredo Diamante, Dumdum Marine Services (DMS) nilang Dana Andrew Dumdum ug Poblacion kagawad Eddie Prigo, Carmen Copper Corporation (CCC) nilang Rodrigo Cal, Engr. Jose Antonio Pintor ug Raul Rodellosa, Joemags ni Engr. Villaver, GN Bakeshoppe sa magtiayong Noel ug Ginger Galo ug Rollway ni Jason Arquizola.
Ang torneyo mosubay og single round robin diin ang top two teams maoy magsangka alang sa taktakay nga kampiyonato. Ang No. 3 ug No. 4 teams magtigi alang sa ikatulong dapit.
Matud pa ni Eddie Montebon, ang tournament media officer, nga atol sa ilang miting nga gipatawag nilang SB members Christian M. Cañada ug Arnold T. Cuyos, ang chairman ug vice chairman sa Committee on Sports, ilang nasabotan nga tungod sa kaapike sa oras ipaagi na lang og single round robin ang format sa duwa ubos sa pagdumala ni tournament chairman Deogracias E. Caligner.
Ang officiating officials pangulohan ni Jose 'Boy' Murillo. (BANAT NEWS)
- Latest
