Pinoy boxers nalagas na

AMMAN, Jordan--Bigo ang Pambansang boksi­ngero na matularan ang naabot ng ipinadalang koponan dalawang taon ang nakalipas nang masi­bak na ang dalawang nala­labing panlaban sa Asian Elite Men’s Boxing Cham­pionships sa quarterfinals noong Biyernes sa Amman, Jordan.

Hindi umubra ang 2010 Asian Games gold meda­list na si Rey Saludar sa husay ni Tanes Ongjunta ng Thailand nang lasapin ang 28-29 iskor sa tatlong hurado para mamaalam na sa fly­weight division.

Si Saludar ang siyang nagbigay ng karangalan sa bansa noong  2011 edisyon ng kompetisyon sa Korea matapos manalo ng bronze medal.

Sumunod na napatalsik ang baguhang si Rogen Ladon nang kunin ang majority decision na pagkatalokay Temartas Zhussupov ng Kazakhstan.

Dinomina ni Ladon ang unang round pero bumigay sa mga susunod na rounds para makuha ni Zhussupov ang 29-28 at 30-27 panalo sa dalawang hurado matapos ang isa ay naggawad ng tablang 28-28 iskor.

Ang iba pang inilaban na maagang nasibak ay sina Mario Fernandez (bantamweight), Junel Cantancio (lightweight) at Joel Bacho (light welterweight).

“Minalas tayo na na­ka­ta­pat agad ang mga ma­lalakas sa timbang na ni­laruan ng ating mga boksingero. Hindi man tayo pinalad, ang karanasan at mga leksyon na natutu­nan ng ating manlalaro ay magagamit nila sa mga su­sunod pang torneo na kanilang lalahukan,” wika ni ABAP executive director at head delegation Ed  Picson.

Sina Pat Gaspi, Ronald Chavez at Roel Velasco ang tumayong mga coa­ches ng koponan na bigong sundan ang naitalang isang ginto at dalawang pilak na naitala sa China Open.