Retanal naghari sa Saudi Riyadh Int'l chessfest

CEBU, Philippines -  Gipabuhagay ni National Master Elwin  Retanal ang tanan niyang kusog aron maghari sa Saudi Riyadh

International Chess Championship nga gipahigayon niadtong Hunyo 26-28 didto sa Saladin Hotel sa Al Riyadh, Kingdom

of Saudi Arabia.

 Si Retanal lumad nga taga-Minglanilla, Cebu, apan mibalhin na ngadto sa Davao pipila na ka tuig ang milabay.

Atua na siya karon nagbasi sa Saudi ug nagtrabaho sa Princess Nora Bint Abdulrahman University.

 Si Retanal ika-84th seed lang sa International Chess Federation-sanctioned tournament, apan misalig sa iyang

kasinatian ug kahinog aron mahimong labing maayo sa tanang maayo.

 Siya ang nag-una  sa 11-round rapid event uban ang 10.0 puntos.

 Ang kanhi varsity player sa University of Cebu (UC) nga si Retanal, miharos sa unom niya ka duwa, gipilde

niya si Janahi Zeyaad ug FIDE Master Ayyad Husain sa Bahrain sa wala pa pildiha si International Master Mohamed

Tissir sa Morocco sa sixth round. Siya lang ang bugtong nakapilde ni Mohamed,  kinsa mipahiluna sa ikaduhang dapit

bitbit ang 9.5 puntos.

 Si Retanal napilde sa iyang ikapitong hugna sa duwa nila ni Gaafar Hassan sa Egypt, apan nakabawi pinaagi sa

pagkulit og upat ka sunod-sunod nga daog batok sa kababayan niyang Pinoy nga si Alvin Alcala, FIDE Master A.

Sambouri sa Jordan, Gamal Abdel Hakam sa Egypt ug Ahmed M Al Ghamdi sa KSA aron masakmit ang champion's

tropeyo. Si Alcala mipahiluna sa ikaupat sa overall uban ang 8.0 puntos. (BANAT NEWS)