Host adamson daog dayon
CEBU, Philippines - Mikulit dayon og daog ang UAAP Season 76 host Adamson Falcons batok sa mas gagmay nga University of the Philippines Fighting Maroons, 79-67 kagahapon didto sa MAll of Asia Arena.
Ang wingman nga si Jericho Cruz maoy nangu sa Falcons sa iyang 19 puntos, ang 11 niini gikan sa second half samtang ang Cameroonian import nga si Ingrid Sewa mihimo'g double-double sa iyang 15 puntos ug 10 ka rebounds .
Tungod sa maong kadaugan, nagtabla na karon ang Adamson, Far Eastern University ug University of Santo Tomas kinsa adunay 1-0 nga win-loss records sulod sa walo ka teams.
Ang Falcons dako kaayo'g bentaha sa rebounds, 53-29 diin ang mga beteranong sila si Rodney Brondial ug Roider Cabrera nagkumboya og 20 puntos ug may 18 ka rebounds kanilang duha.
Ang kanhi La Salle gunner nga si Joseph Marata maoy nangu sa mga batan-ong Fighting Maroons sa iyang game-high 20 puntos nga naglakip og tulo ka triples.
Usa sa mga pambato karon sa UP mao ang kanhi UV Baby Lancers nga si Andres Paul Desiderio kinsa nakig-uban na sa iyang kanhi karibal gikan sa Sacred Heart School-Ateneo de Cebu Magis Eagles nga si Henry Renzar Asilum.
Sa laing duwa, midaug ang title contender National University (NU) Bulldogs batok sa Ateneo Blue Eagles, 64-54. (BANAT PALARO)
- Latest
