Petracorta batok fya sa cipu finals

CEBU, Philippines - Parehong midaug ang Petracorta Brokers ug ang FYA Selection kaniadtong Sabado sa hapon aron magsangka alang sa 2nd season sa Cebu International Port Users (CIPU) knockout finals unya sa Hulyo 13 didto sa barangay-Cogon Ramos gym, ning dakbayan.

Nasuta kung unsa ka-importante sa iyang team si Kenneth Kern Sesante hinungdan nga yanong gipukan sa Petracorta Brokers ang Canillas Brokers (Yoryoj) tungod kay wala mobutho si Sesante kinsa maoy naghatud sa Canillas ngadto sa semifinals.

Tungod kay miabante man sab sa semifinals ang iyang dissenters team sa Season 10 sa IBP, wala makaduwa si Sesante ug dili sab niya mahimong talikdan ang IBP tungod kay ang ilang team maoy host karon nga season.

Sa laing duwa, hugot nga trapping defense maoy hinungdan nganong gilubong sa FYA Selection ang Ynah Brokers, 83-69.

Ang Ynah ug ang Canillas, kinsa maoy defending champion, maoy mag-ilog sa ikatulong pwesto.

Si Marcon Cabaltera maoy nangu sa Petracorta sa iyang 22 puntos apan nahimo siyang sumsoman sa reklamo tungod kay matod pa di siya lehitimong player sa CIPU.

Silang Tony Largosa, Jim Villa, Dodong Manlosa ug Marvin Sillar pulos miposa og double figures alang sa Canillas ni team owner Roy ug Joy Canillas. "Lisod gyud og wala si Kern (Sesante) but we have a good season," matod pa ni Canillas kinsa mapahiubsanon kaayong midawat sa ilang kapildehan.

Sa laing bahin, nagmangtas silang Janus Abellana ug Baeng Medalle kinsa miburak og 26 ug 25 puntos matag usa alang sa mas teamwork nga FYA Selection.

Medyo nasilo gamay ang CIPU treasurer nga si Jeff Garcia tungod kay matod pa niya dili pa opisyal nga membro sa CIPU si Junrey Arreglo tungod kay wala siya maka-fill up sa membership form apan nakaduwa lang gihapon siya human mosugot ang usa sa ilang opisyal nga si Yoly Cena.

Puntos matag usa:

First Game:

Petracorta (95)----  Cabaltera 22, Cedeño 18, Palero 12, Moral 9, Pepito 7, Villaronza 6, Solidarios 6, J. Petracorta 5, Sagario 4, N. Petracorta 2.

Canillas (82)---      Largosa 18, Villa 16, Manlosa 15, Sillar 11, Bensi 7, Dela Cerna 6, Embrado 2, Belarmnio 2.

Second Game:

FYA (83)---            Abellana 26, B. Medalle 25, Marata 7, N. Laborte 6, N. Medalle 4, Arreglo 4, Apuya 4, T. Laborte 4.

Ynah (69)---           Gambe 24, Cabanero 12, Allerite 9, Niones 8, Garcia 6, Tecson 6, Manulat 2, Carmen 2.  (BANAT PALARO)