Rondo adto'g dallas?

CEBU, Philippines - Bag-o lang mihimo'g mga makapakurat nga lakang ang Boston Celtics ug usa niini ang ilang pagtugot nga mobiya si coach Doc Rivers aron mobalhin ngadto sa Los Angeles Clippers ug ingon man ang mega deal nga nagpadala nilang Paul Pierce, Kevin Garnett ug Jason Terry ngadto sa Brooklyn Nets.

Mosunod niini mao ang ilang pagporma ug paglahugay sa ilang mga players.

Apan daw sa wala pa mahuman sa iyang trabaho si Danny Ainge tungod kay dunay laraw ang Celtics nga e-trade si Rajon Rondo ug usa sa team nga interesado mao ang Dallas Mavericks.

Sumala pa sa taho, interesado kaayo ang Dallas nga kuhaon ang All Star point guard nga si Rondo nga gituohang kalabot sa rebuilding effort sa Boston apan ang uban nagtuo sab nga paagi kini ni Ainge nga e-trade si Rondo aron makakuha'g dugang mga maayong player alang sa ilang kaugmaon.

Ang Mavericks nagpakita og pagkaagresibo atol sa offseason dihang gipangulohan ni Mark Cuban ang lakang pagpangita'g players nga makatabang sa ilang kampanya ilabi na kay nag-anam na katiguwang si Dirk Nowitzki.

Gusto ni Cuban nga dali silang makarekober aron mahimo dayong championship contender.

Wala moabante sa playoffs ang Mavericks sa miaging season ug natumbok nga ang rason mao ang kahuyang sa ilang point guard. Human ilang gikuha si Darren Collison, nahimo sab nga starting point guard ang 38-anyos nga si Mike James.

Nahuyang ug samot ang Dallas dihang mibalhin silang Jason Kidd ug JJ Barea nga kabahin sa ilang 2011 championship.

Si Rondo maoy posibleng makahatag og dakung kalamboan alang sa Dallas.

Duna pa gyu'y hugon-hugon nga dugang pang mga start players ang kuhaon sa Dallas nga naglakip kanilang Dwight Howard ug Chris Paul.

Sa ilang pagkadesperado nga mokuha'g maayong point guard, ila sab puntariya si Brandon Jennings sa Milwaukee Bucks.

Alang sa Dallas, dakung kubit kung mobalhin si Rondo bisan pa og wala silang Paul o si Howard.

Si Rondo maoy tubag nga makatabang kanilang James ug ni Collison ug makahatag kang Nowitzki sa usa ka lehitimong pagsuway sa lain na sab nga kampyonato.

Sa pagbalhin ni Rondo sa Clippers, mihanap nga makuha sa Dallas si Paul kinsa maoy nagsige'g apura sa management sa Clippers nga kuhaon gyud si Rivers isip maoy ipuli kang Vinny del Negro.   (BANAT PALARO)