Gasca mikulata ni Aducal sa ALA-Cobra fight
CEBU, Philippines - Milampos ang ALA Gym boxer nga si Roli Gasca sa pagpukan ni Jimmy Aducal pinaagi sa "unanimous decision" sa main event sa ALA-Cobra "Tunay na Lakas" fight card niadtong Sabado sa gabii didto sa municipal plaza sa Bantayan Island.
Gigamit sa lumad nga taga-Barili, Cebu ang iyang abilidad sa counter-punching aron mopasud og mga solidong kombinasyon ngadto sa ulo ug lawas ni Aducal.
Mipauwan og bangis nga kinumo si Gasca sa eight round diin diriyot niya nga mapaundang si Aducal, apan ang nauwahi mipakita sa iyang kalig-on aron makarekober gikan sa ataki sa ALA Boxer.
Human sa 10 ka rounds nga binukbukay, si Gasca maoy mipatigbabaw sa scorecard, 99-91, 99-91 ug 98-93.
Sa maong kadaugan, ang kanhi OPBF champion nga si Gasca miinat sa rekord nga 20-4, 5KOs, samtang si Aducal nakahiagum sa iyang ikaduhang pilde sud sa walo ka away.
Sa supporting main event, midaog usab ang stablemate ni Gasca nga si Mark Acub (12-0, 9KOs) pinaagi sa "majority decision" batok ni Rene Bestudio (15-5, KOs).
Mokompleto sa lista sa mga midaog mao sila si John Vincent Moralde batok Rolando Navarette, Ivor Lastrilla batok Jun Intor ug Kim Galon batok Ryan Canillas. (BANAT PALARO)
- Latest
