FESSAP mas gidayeg kaysa POC

Didto diay sa Manila, dili tanang mga sportswriters ang mibilib sa Philippine Olympic Committee kay ang uban kanila mas midayeg ngadto sa Federation of School Sports of the Philippines kon FESSAP.

 diay sa Manila, dili tanang mga sportswriters ang mibilib sa Philippine Olympic Committee kay ang uban kanila mas midayeg ngadto sa Federation of School Sports of the Philippines kon FESSAP.

Gani ang writer sa Remate nga si Benny Antiporda, misaway og maayo kang  Peping Cojuangco, ang chairman sa POC nga matod pa niya wala gyu'y nahimo ug nagwari-wari lang sa kwarta gikan sa mga magbubuhis.

Nakapangutana si Antiporda kung pila na ba ka gold medals ang nahakot ni Cojuangco dinhi sa Pilipinas. Wala gyud kuno bisan la'g bronse.

Nunot sa pagsulbong niining FESSAP nga nagtinarung sa ilang pagtabang sa mga students-athletes, sangko sab sa langit ang kasina niining uban natong mga sports leaders nga nagtuo bitaw gyud nga sila ray makamao ug dinhi sa kalibotan ang ubang mga sports leaders amaw sila maoy dili.

Medyo mga baga-baga sab gyud ug kubal sa "n....g ning uban natong sports officials uy kay matag dunay Olympics, maglumba-ay ug larga kuyog pa ang ilang mga asawa unya ang buhaton didto igo ra magsige og pakpak unya human sa duwa kung gipanglatos na ang atong mga atleta, moadto dayon sila'g mga shopping malls aron sab tawon makuha-kuhaan ang ilang per diem nga U.S. dollars.

Kini kunong POC matod pa ni Antiporda gihimo lang intawong "milking cow" o gatasan ning atong mga baga nga opisyales ug dili ang pagtabang sa atong sports development.

Sumala pa ni Antiporda nga niadtong 2012 London Olympics, miabot og 30 milyones nga pundo ang gihatag didto sa PSC  aron gastoon sa POC ni Peping Cojuangco.

Ang resulta? itlog. Angayan untang mauwaw kining atong mga sports leaders apan lagi kay baga man, aw okay lang uy. 

Apan unsa ba kining FESSAP? Kining FESSAP usa ka organisasyon sa mga colleges ug mga universities nga accredited sa  Federacion Internationale du Sport Universitaire (FISU) nga tua magbase sa Brussels, Belgium ug aduna kini 170 ka nasud nga miyembro lakip na ang Pilipinas.

Gilangkuban kini sa 13,500 ka unibersidad nga gikan sa mga nasud sa China,USA, Australia ug uban pa ug sa laktud pagkasulti, ang FESSAP usa ka Olympic sa mga college students.

Ang FESSAP usa ka pribadong grupo nga wala magsalig og limos sa gobyerno aron bansay-bansayon ang mga atleta ug makamao kini mangitag pundo. Mao bitaw tingali kini rason nganong masuya-an kay masina ang uban nganong naa kana sila. Mura bitaw miingon sa atong yanong dialogo "nganong nagtukod pa man ka?" Kung wala pa ka ako man unta nang tanan. Kana bitaw'ng mga sinultihan sa suwapang o garapal. Sus, kung maoy magdaghan diyutay ra.

Diay usa sa grupo nga nagmalasakit alang ni Juan dela Cruz unya ila pa gyung suyaan?

Kung naa may angay magpasalamt niining FESSAP, way lain ang mga atleta gikan sa Promdi lakip na kitang mga Sugboanon. Unang naka-benipisyo ang UC dihang miadto sila sa 26th Universiade sa Shenzen, China sa 2011 ug karong umaabot Hulyo 6, ang UV na sab maoy muadto sa Kazan, Russia alang sa ika-27th Universiade. Unya tarung ba diay nga ato kining pasipad-an pinaagi sa pagbuhi og mga ngil-ad nga pulong nga dili makaon sa iro?

Ang kining mga Promdi athletes mao kini ang gikan sa probinsiya nga kanunay dili mahatagan og pagtagad sa PSC  ug POC tungod lagi kay mga pobre ug wala sila'y makuha isip bawos.

Daghan untang mga players sa UAAP ang gustong mokuyog sa  Russia apan matod pa ni Antiporda, gipangbabagan sila sa mga UAAP officials.

Niining bag-o lang, hisayran sa mga sports writers sa Manila nga kini diay si Cojuangco nagpadala og suwat ngadto sa Olympic Council of Asia nga nag-awhag nga dili FESSAP maoy morepresentar didto sa Russia kung dili ang mga players gikan sa UAAP.