Westland nakarekober

CEBU, Philippines -  Nakabawi ang Westland gikan sa ilang kapildihan sa opening game dihang ilang gipahimungtan ang Air and Beyond pinaagi sa paglubong, 77-59 sa LLBA Mayor Paz   Radaza Cup 2013 basketball tournament didto sa Villas Magallanes gym sa Lapu-Lapu City.

 Wala sab miagi'g kulba ang kadaugan sa Igot Trucking human sab nila gilubong ang A.C. Sports ni Archie

Baba sa iskor nga 104-66.

 Kontrolado sa Westland ang kinatibuk-ang duwa ubos sa trayanggulo nilang Archie Dungon, Glen Aying ug Undo Igot nga pulos miiskor og double figures. Si Dungon mibundak  og 16 puntos, samtang sila si Aying ug Igot mihirit og 14 puntos matag usa alang sa balanseng opensa sa Westland.

 Ang Air and Beyond ni Shamly Bercede gipangulohan ni Jake Felix nga mikimada og 23 puntos, apan

nakawang lang ang iyang mga paningkamot kay kulang siya'g suporta gikan sa   kaubanan niya. Si Bryan Hiyas mao lang ang nakatampo'g double digits alang sa napildeng Air and Beyond pinaagi sa iyang 12 puntos.

 Sa laing bahin, bawot kaayo ang duwa sa Igot Trucking ug A.C. Sports sa unang duha ka kuwarter diin

nagligas lang kini og dos puntos sa halftime, 28-26.

 Apan ang Igot Trucking kalit lang nga miarangkada sa third period sa pagmaneobra ni Bulldog Ybañez, kinsa maoy kinadaghanang iskor nga nahakot nga adunay 23 puntos. Sila si Jogy Manlangit ug Edwin Ugsimar parehong mibagnos og 20 puntos, samtang si Roque Rakawa midiskarga  og 16 puntos.

 Ang naparot nga A.C. Sports gipangulohan ni Bosyo Ompad pinaagi sa iyang 14 puntos, gisundan ni Brian Baring nga adunay 10 puntos.

PUNTOS MATAG USA

Unang duwa:

 WESTLAND (77)  - Dungon 16, Aying 14, Igot 14, Campilan 8, Villamor 8,  Arabia 6, Gutib 5, Ouano 3,

Ompad 3

 AIR AND BEYOND (59) - Felix 23, Hiyas 12, Sido 6, Chan 5, Bercede 5, Rosal 4, Reyes 2, Dano 2

Ikaduhang duwa:

 IGOT TRUCKING (104) - Ybañez 23, Manlangit 20, Ugsimar 20, Rokawa 16, Bautista 9, Intud 3, M.

Aying 3, Bentazal 3, Cobacha 3, Dejito 2, J. Aying 2

 A.C. SPORTS (66) - Ompad 14, Baring 10, Delarama 7, Baldado 7, Surmin 6, Icot 5, Abellana 5, D. De

Jesus 4, T.  De Jesus 2, Misa 2, Asejo 2, Simbajon 2 (BANAT PALARO)