Ynah ug Canillas Brokers nagmangtas

CEBU, Philippines - Gipakuratan sa Ynah Brokers ang mas paboritong Mac Nels Forwarders pinaagi sa pag-iskor og 73-69 nga kadaugan samtang gitinuod sa Canillas Customs Brokers (Yoryoj) ang ilang on-bearing game batok sa kugihan ug upset-seeking nga Alin Brokers, 85-63 sa nagpadayong 2nd season Cebu International Port Users (CIPU) basketball tournament didto sa CEC gym.

Wala maanugon ang biyahe padung dinhi sa Sugbo ni PIL Shipping Lines operations manager Jury Garcia gikan sa Davao tungod kay kabahin siya sa ilang kadaugan. Sa miaging torneyo dihang gi-ila pa sila nga CEBAMA, dili kaayo maayo og agi ang ilang team.

Depensa ug determinasyon nga modaug maoy gihimong puhonan sa Ynah kinsa kataposang mitabla sa duwa sa nahibiling 3:28 sa fourth quarter pinaagi sa basket ni  Neil Villarin gikan sa assist ni Garcia.

Singko puntos lang ang labing dako nga labaw sa Ynah, 39-34 pagtapos sa second period apan bisan og kanunay maka-rally ang Mac Nels, ila gihapon kining masumpo ug ang mainitong opensa sa nahibiling tres minutos sa duwa.

Balanse nga opensa ang opensa sa Ynah diin duha kanila ang mihimo'g double figures apan daghan kaayong naka-amot og labing menos singko puntos. Ang managsoong Jef ug Jury Garcia nagkumboya og nuybe puntos apan mas nakatabang sila sa depensa tungod kay misukol sila sa ginukdanay.

Sa laing bahin, madasigon nga matang sa duwa ang gipakita sa Canillas ug daw sa ilang gipangandaman ang maong karibal tungod kay nagpauwan sila'g mga puntos ug tagdugay makasukli ang Alin Brokers.

Mibalik na sab og duwa ang pambatong point guard nga si Kenneth Kern Sesante kinsa maoy nagpahiluna sa duwa. Silang Jimmy Villa ug Marvin Sillar parehong mibahug og 14 puntos ug pareho sab mihakot og 11 puntos silang Ferdie Sigue ug Rex Bensi samtang si Sesante midugang og 10 puntos.

Usa na lang ka duwa sa dili pa mahuman ang elimination round karong Hunyo 8 tali sa FYA ug Mac Nels. Ang tanang teams adunay tag-pito ka duwa sa elimination.

Gitapos sa Ynah ang elimination sa ilang 4-3 nga baraha samtang adunay 4-2 ang Mac Nels. Sa laing bahin, nagtabla ang Canillas ug Alin sa 3-4 nga baraha.

 Puntos matag usa:

First Game:

Ynah (73) –  CJ 13, Manulat 12, Tecson 7, Je. Garcia 6, Villarin 5, Amistoso 5, Peras 5, De Castro 4, Ju. Garcia 3, Carmen 2, Allerite 2.

Mac Nels (69) – Singson 26, Cabillada 10, Dellosa 8, Tandas 6, Canoy 4, Balorio 4, Allan 3, Labrador 3, Castillo 2.

Second Game:

Canillas (85) – Sillar 14, Villa 14, Bensi 11,Sigue 11, Sesante 10, Embrado 8, Dela Cerna 7, Yap 5, Manlosa 5.

Alin (63) –Barral 20, Lleve 17, Alimoren 8, Herbito 6, J. Alin 3, Desucatan 3, Laurel 2, I. Alin 2, Lobitana 2.