Andam na ang tanan alang sa Castrol autocross race

CEBU, Philippines -  Mobalik na sab dinhi sa Sugbu ang kulbahinam nga motorsports action pinaagi sa Visayas leg sa Castrol Edge 2013 Regional Autocross Championship Series sa Mayo 25-26 didto sa Sugbu grounds sa South Road Properties (SRP).

 Ang duha ka adlaw'ng kompetisyon nga gipasiugdahan sa The Racing Line maoy mosubo sa tulo ka leg series. Ang ikaduhang hugna gikatakda sa Hunyo 29-30 didto gihapon sa Sugbu grounds.

 Si race organizer Niel Labrador misaysay nga si defending champion David G. Lim sa DGL Motorsports, ang undisputed king sa Cebu car racing circuit, mopakita sa iyang katakus isip guest racer.

 Gawas nga mohimo og exhibition run, si Lim mopaambit sab og pipila  ka mapuslanong driving tips ngadto sa aspiring car racers.

 Tungod niini, si Labrador malaumon nga adunay bag-ong  mga dagway nga mosubang ug mosalmot sa pasundayag nga gidalit sa The Racing Line ni Jong Uy uban sa Castrol  Edge Magnatech, Thirsty ug Nature's Spring.

 Sa laing bahin, gibanhaw ni Labrador ang iyang team nga DSM Racing Performance (Davaeñong Sugbuanong Motorista) human sa pito ka tuig nga pagkahilum aron mosalmot  ning umaabot nga talan-awon.

 Lain pang mga grupo nga mipadayag sa ilang partisipasyon sa maong kalihukan mao ang Club Fit Cebu, Club Nissan Sentra Cebu, Dub City, Group B Motors, MITSUGBO, NCR (No Care Racing), NOW12, Toyota Auto Club Cebu ug uban pa.

 Gawas sa club race diin ang mga miyembro sa samang koponan mosulay sa usa'g-usa sa ilang driving skills.

 Ang lain pang mga kategoriya nga tigian naglakip sa beginners, novice, intermediate ug experts.

 Ang mga partisipante makabaton og puntos sa matag leg. Ang entrante nga makasakdap og labing daghang puntos human sa tulo ka legs maoy ideklarar isip "Driver of the Year." (BANAT NEWS)