Global FC misiro sa Bhutan sa AFC President's Cup

CEBU, Philippines - Gisugat og daog ang Global FC sa una nilang duwa sa AFC President’s Cup qualifiers human nila sirohi ang Yeedzin FC-Bhutan, 5-0, sa miaging gabii  didto sa Cebu City Sports Center (CCSC) field.

 Atubangan sa 2,500 ka mga Cebuano football fans, gihatagan og garbo sa Global FC ang mga Pinoy human nila gilatos ang Yeedzin, kinsa naglisud   pagpasud sa ilang mga goals tungod sa makatuok nga depensa sa host team.

 Ang Fil-German nga si Patrick Reichelt, kinsa misubay sa iyang mga kaliwat sa lungsod sa Argao, maoy unang naka-goal alang sa Global FC atol sa unang singko minutos sa duwa.

 Gawas ni Reichelt, mitampo usab sa tagsa-tagsa nila ka goal alang sa Global FC  sila si Carli de Murga, Ben Starosta, Misagh Bahadoran ug Marwin Angeles.

 Ang Global FC sunod makigsangka sa KRL FC sa Pakistan karong alas-7:30 sa gabii, human sa duwa tali sa Yeedzin FC ug Dordoi FC sa Kyrgyzstan.