Thunder, Pacers, Knicks; Grizzlies pasok sa 2nd round

HOUSTON-- Nag-text si Kevin Durant kay Kevin Martin para palakasin ang loob nito matapos ang masamang  inilaro sa Game 5.

Alam ni Durant na ba­bawi si Martin.

Umiskor si Durant ng 27 points, habang may 25 si Martin para pangunahan ang Oklahoma City Thunder sa 103-94 panalo kontra sa Houston Rockets para tapusin ang kanilang first-round playoff series sa 4-2.

Lalabanan ng Thunder ang Memphis Grizzlies sa pagsisimula ng second round sa Linggo.

Sa Game 5, tumapos si Martin, nakuha ng Thunder sa trade kapalit ni James Harden, na may 3 points kumpara sa Game 6 kung saan siya humugot ng 21 points sa halftime.

Hangad sana ng Roc­kets na maging ikalawang koponan sa NBA history na nakapuwersa ng Game 7 matapos mabaon sa 0-3 sa serye.

Si Martin ang pumalit kay All-Star guard Russell Westbrook, sumailalim sa isang season-ending knee surgery, sa starting line-up ng Oklahoma City, habang nagdagdag si Reggie Jackson ng 17 points.

Sa Atlanta, tumipa sina George Hill at David West ng tig-21 points at tinalo ng Indiana Pacers ang  Atlanta Hawks, 81-73, para tapusin ang kanilang serye sa 4-2.

Matapos wakasan ang isang 13-game losing slump sa Atlanta sapul no­ong Disyembre 2006, bibiyahe ang Indiana patu­ngong New York para labanan ang Knicks sa second round.

Nakatakda ang Game 1 sa Linggo sa Madison Square Garden.

Sa Boston, nagsalpak si Carmelo Anthony ng isang pullup jumper kasunod ang pagkonekta ng una niyang 3-pointer matapos ang 0-of-20 shooting para pamunuan ang New York Knicks sa 88-80 paggupo sa Boston Celtics.

Isinara ng Knicks ang kanilang serye ng Celtics sa 4-2.

Sa Memphis, gumawa sina Mike Conley at Zach Randolph ng tig-23 points para igiya ang Memphis Grizzlies sa 118-105 panalo laban sa Los Angeles Clippers at itiklop ang kanilang serye sa 4-2.

Ang Grizzlies ang na­ging pang-10 koponan sa NBA history na nanalo ng apat na sunod na laro matapos ang 0-2 pagkakaiwan sa serye.

Lalabanan nila sa se­cond round ang Oklahoma City Thunder.