Alcoseba miretiro isip coach sa SWU
CEBU, Philippines - Nakurat ang tibuok local basketball community human sa kalit nga pagretiro ni coach Raul 'Yayoy' Alcoseba isip head coach sa reigning CESAFI champion Southwestern University (SWU) Cobras.
"I would like to announce that I am stepping down from my post as head coach of the SWU Cobras," matud pa ni Alcoseba sa pakighinabi sa The Freeman, ang igsuong mantalaan sa Banat News kagahapon.
Labing nasurprisa sa kalit nga pagretiro ni Alcoseba mao si SWU Athletic Director Ryan Aznar, kinsa miingon nga wala pa sila kadawat og "formal request" gikan sa legendary coach nga mobiya kini sa koponan. Sumala pa ni Aznar nga aduna pa kini nahabiling usa ka season sa iyang tulo ka tuig nga kontrata uban sa SWU.
"I really don't know about it. Coach Yayoy's resignation did not come from us. As far as SWU is concerned, he signed a three-year contract with us that will expire next CESAFI season yet. If he really wants to step down from his post, he should first make a formal request to us. That would be the most prudent thing to do," matud ni Aznar.
Sama ni Aznar, nakugang usab si CESAFI commissioner Felix 'Boy' O. Tiukinhoy Jr. sa resignation ni
Alcoseba ug gianugnan siya tungod kay usa ka banggiitan ug bantugan nga coach ang nawala sa iyang liga.
Bugtong gihatag nga rason ni Alcoseba sa iyang pagbiya sa SWU mao nga gusto niya mopukos sa iyang
kampanya alang sa May 13 elections.
Ang three-term councilor sa Cebu City nga si Alcoseba magpapili pagka-Provincial Board member sa unang distrito sa lalawigan sa Sugbu.
Si Alcoseba, kinsa daghan na'g nadaog nga lokal ug nasyonal nga torneyo samtang siya pa ang coach sa M. Lhuillier Kwarta Padala-Cebu Niños, mibalik sa collegiate hoopdoom uban sa Southwestern University niadtong 2011.
Sa iyang ikaduhang season, si Alcoseba nakahimo'g impact pinaagi sa pagtuboy sa Cobras ngadto sa 12th Cebu Schools Athletic Foundation Inc. (CESAFI) men's basketball championship.
Si Alcoseba mikulit sab og kasaysayan isip bugtong collegiate coach nga mihipos og lima ka titulo uban sa tulo ka managlahing eskwelahan -- ang University of San Jose-Recoletos (USJ-R) Jaguars niadtong 1986 ug 1987, ang Cebu Doctors' College (karon CDU) White Stallions sa 1994 ug 1999 ug ning bag-o SWU Cobras. (BANAT PALARO)
- Latest
