ALA-Cobra boxing ugma sa gabii sa Mandaue City

CEBU, Philippines - Isugal ni ALA Boxing Gym fighter Melvin Gumban (13-0, 6KOs) ang iyang limpyong rekord batok ni Fernando 'Batang Bato' Ocon (10-4, 2KOs) sa 10 round non-title bout sa ALA-Cobra Energy Drink: Tunay na Lakas Boxing karong Sabado sa gabii didto sa Mandaue City Heritage Plaza.

Si Gumban sa Escalante City, Negros Occidental,  lab-as pa sa iyang "unanimous decision" nga kadaugan batok ni kanhi Philippine flyweight champion Marjun Tabamo niadtong Pebrero 23 didto sa Tagbilaran City.

Hinuon, si Gumban kinahanglan nga mopamatuod sa iyang katakus sa iyang pakigsangka ni Ocon sa RWS Stable sa Sugbuanong promoter nga si Rex 'Wakee' Salud.

Si Ocon katulo na miaway gawas sa nasud lakip ang iyang sangka batok ni Indonesian Tommy Seran. Hinuon, napilde siya pinaagi sa "split decision" sa ilang WBO Asia-Pacific light flyweight title bout sa miaging tuig didto sa Kupang, Indonesia.

Sa supporting main event sa maong boxing card nga  libre sa tanan, si  kanhi Philippine flyweight contender Aroel Romasasa makigbinukbukay ni Pedro Balaba, samtang si Juren Labordo moharong ni Rowell Garcia.

Mokompleto sa undercard mao ang sangka nila ni Rey Morales batok Renante Suacasa, Lito Dante  batok Rez Padrogane, Brian Lobitania batok Rocky Alvarez ug Ivor Lastrilla batok Takaoki Noma.

Ang official weigh-in sa maong kalihukan himuon karong adlawa sa alas-12 sa udto didto sa Pacific Mall sa Mandaue.