Charlie batok hotel sa cekalco finals
CEBU, Philippines - Yano kaayong gipukan sa Team Charlie ang Golf, 93-84 kaniadtong Biyernes aron moabante sa finals sa nagpadayong Center Katipunan A. Lopez Christian Organization (CEKALCO) 2013 second season basketball tournament didto sa A. Lopez open court in barangay Labangon, Cebu City.
Naunhan unta sa Golf ang Charlie sa sayong bahin sa duwa pinaagi sa opensa nilang Gino Almencion ug Irven delos Reyes apan daling nakabawos ang Charlie didto sa second quarter diin ilang na-outscore og diyutay ang Golf, 18-16 pinaagi sa puntos nilang Estoy Panerio ug Coronel Baculio aron tablahon ang iskor sa 38-all atol sa halftime.
Padayong nanginit ang opensa sa Charlie didto sa third period ug ila gihapon na-outscore ang Golf, 26-23 ug sa hinay-hinay nilang kamang, nakamaneho sila'g poste og 64-61 nga bentaha pagsugod sa fourth period.
Didto na sa fourth quarter gitinuod og maayo sa Charlie ang Golf aron modaug og nuybe puntos.
Si Richard Gubaton mihimo'g 16 puntos sulod lang sa fourth period.
Tungod sa maong kadaugan, ang Charlie maoy nakakuha sa ikaduhang luna sa finals ug sila maoy makigtakos batok sa Hotel sa title showdown karong semanaha.
Kung kahinumdoman, midaug ang Hotel batok sa Delta ni Roland "El Presidente" Sameon, 115-105.
Si Gubaton maoy nangu sa Charlie sa iyang 28 puntos ug midugang si Panerio og 16 puntos samtang nagkumboya silang Baculio ug Molejon og 22 puntos.
Ang Golf gipangulohan nilang Kit Arellano ug Gino Almencion sa ilang 26 ug 23 puntos, matag usa ug si Delos Reyes mitikdol og 10 puntos.
Puntos matag usa:
CHARLIE (93)- Gubaton 28, Panerio 16, Baculio 12, Molejon 10, Soco 8, Do. Panugaling 6, Ensong 5, Besties 4, Bacho 2, Dolera 2, Da. Panugaling 2.
GOLF (84)- Arellano 26, Almencion 23, I. Delos Reyes 10, Garcia 6, Amahan 6, K. Delos Reyes 4, Hortezano 4, Bentozal 3, Barellano 2.
- Latest
