Donaire napukan Filipino superstar misaad nga mobalik

CEBU, Philippines - Nakuratan ang tibuok kalibutan sa boxing human milampos ang Cuban champion nga si Guillermo ‘The Jackal’ Rigondeaux sa pag-iskor og usa ka ‘upset’ nga kadaugan batok sa mas gipaboran nga si Filipino boxing superstar Nonito ‘The Filipino Flash’ Donaire kagahapon didto sa Radio City Music Hall sa New York.

Gamit ang iyang kaiglas ug kapaspas gilupig sa kanhi two-time Olympic gold medalist nga si Rigondeaux si Donaire pinaagi sa unanimous decision, 114-113, 115-112 ug 116-111, aron ma-usa ang WBA ug WBO super bantamweight titles.

“Today I proved it. I showed I am the best at 122 pounds division,” matud pa ni Rigondeaux sa Associated Press.

Miulbo dayun ang aksiyon sa pagsugod sa away diin nagsinukliay sa ilang mga kinumo ang duha ka boksidor, apan wala kaayo kini magdugay human kalit nga nausab ang istilo ni Rigondeaux kinsa nagtuyok-tuyok sulod sa ring.

Sa gibuhat sa Cuban champion, wala kaayo makapa-igo sa iyang mga kombinasyon si Donaire kinsa nagpunay og gukod ni Rigondeaux kinsa migamit sa iyang mga jabs ug straight punch aron pugngan ang atake sa Filipino boxer.

Human mabatyagi nga pilde na siya sa pinuntusay, mihimo og kalit nga atake si Donaire sa 10th round diin milampos siya pagpatumba ni Rigondeaux, apan nakabangon ang Cuban boxer ug nakahimo pagtiwas sa away hangtud sa katapusang bagting sa kampanilya.

Mapahiubsanon hinuon nga miangkon sa iyang sayup si Donaire ug misaad nga mamawi sa sunod niyang sangka diin posible siya nga musaka sa featherweight division.

“He (Rigondeaux) don’t have any power inside, and we should have pressured him. I was just going with one-punch, and that was a mistake that I made,” matud pa niya. "I'll come back and do better, for now, I congratulate Rigondeaux."

Si Donaire nakahiagum sa iyang ikaduhang pilde sud sa 31 ka away, samtang si Rigondeaux pabiling way pilde sud sa iyang 12 ka away.