Cobras vs. Blue Eagles

CEBU, Philippines - Sugdan na sa reigning CESAFI men's basketball champion Southwestern University (SWU) Cobras ang ilang kampanya alang sa titulo  sa dihang ilang sangkaon ang UAAP five-peat titlist Ateneo Blue Eagles sa pag-ulbo sa 7th FilOil Flying Premier Cup karong adlawa didto sa The Arena sa San Juan City.

Ang Cobras ug Blue Eagles magtakus sa alas-6 sa gabii human sa duwa sa La Salle Green Archers nga makigtigi sa University of Sto. Tomas (UST) Growling Tigers nga sugdan sa alas-4 sa hapon.

Sa unang duwa sa alas-2 sa hapon, ang National University (NU) Bulldogs mosugod na pagdepensa sa ilang korona batok sa NCAA grandslam champion San Beda Red Lions.

Ang SWU Cobras maoy labing unang provincial team nga gidapit  sa pagduwa sa prestihiyosong liga sukad kini mapabarog niadtong  2006.

Kini tungod sa  impresibo nilang labok nga gipakita sa Philippine  Collegiate  Champions League (PCCL) sa miaging tuig.

Ang Cobras gipangulohan kaniadto ni Cameroonian recruit Ben Mbala, kinsa anaa na karon niduwa sa La Salle. Apan dili siya makaduwa sa Green Archers tungod sa "residency rules"  nga kinahanglang mopaubos pa siya og two-year residency sa dili pa siya moduwa.

Si  SWU coach Raul 'Yayoy' Alcoseba moparada sa laing Cameroonian nga si Fabrice Siewe uban sa Fil-Am recruits nga sila si Melvin Holper ug Francis Orgeta.

Itugyan sab ni Alcoseba   ang iyang pagsalig ngadto nilang Mobert Arong, Bernie Bregondo, Darryl Goloran, Justin Aboude, Merbien  Didace, Cris Lopez ug John Pajantoy uban nilang Jabe Bautista, Nilton John Otida ug Mark Panerio, kinsa niduwa kaniadto sa University of San Carlos (USC) Warriors.

Sa ilang bahin, ang Blue Eagles moparada  sa ilang Fil-Am Chris Newsome uban sa suporta sa Cebuano playmaker Jerie Pingoy.