Siso Miabante Finals

CEBU, Philippines -  Miiskor na sab og laing makabungog nga kadaugan si Sally Mae Siso, ning higayon batok ni Grace Melchor sa Tacloban aron moabante sa girls' 21-under finals sa 18th Gullas Tennis Cup kagahapon didto sa Cebu International Tennis Centre Inc. (CITCI) court sa Laray, Consolacion.

 Gisirohan ni Siso ang bisitang si Melchor sa straight sets, 6-0, 6-0 aron moduwa sa finals batok ni Kezia Jabines sa Leyte nga mipalagpot ni Elgy Dasian, 6-2, 6-3.

 Nakabawos hinuon si Dasian ngadto ni Jabines sa ilang duwa sa girls' 18-under semifinal match, 6-1, 6-2.

 Si Dasian moharong sunod ni Jana Pages o di ba ni Mary Claire Lazaga, kinsa miabante sa championship round human gitaktak si Sheena Camporedondo, 6-2, 6-2.

 Sa girls 12-under finals, si  Cristela Sampan makigbatok ni Mary Nathalie Cobarde.

 Gitaktak ni Sampan si Pherl Bless Coderos, 6-1, 6-1, samtang si Cobarde mipulbos ni Tamara Suquib, 6-1,

6-0.

 Sa men's 21-under, sila si Jessie Daniel Villarin ug Jeffrie Jumawan magsangka sa usa'g-usa sa penultimate round, samtang si Marc Norman Enriquez moharong ni Amiel Ayaay human nila gipilde silang Joshua Bendoy, 6-0, 6-0, ug Christian Edullantes, 6-2, 6-1.

 Nakompleto na sab ang semis cast sa boys 16-under diin ang taga-Manila nga si Elijah Arevalo makigbatok ni Christopher Encarnacion ug Joshua Kinaadman batok Andrei Rodriguez.

 Si Arevalo midaog batok ni Francis Lambayan, 6-3, 6-1, si Encarnacion mipukan ni Raymart Arevalo sa Manila, 6-1, 6-2, si Kinaadman miposte og 6-1, 6-1  nga kadaugan batok ni Jermaine Laurel, samtang si Rodriguez mipilde ni John Bienes, 6-3, 6-4.

 Si Kinaadman gikatakda sab nga moduwa sa boys 18-under semis human sa iyang 6-2, 6-2 nga kadaugan batok ni Christian Dale Soon.

 Sa unisex 10-under, si Cesar Kristofer Salimbangon makigtigi ni Cristela Sampan, samtang si Harland Hogan makigbatok ni Gabriel Trazo.