Dasian Sud semis sa 18th Gullas Cup

CEBU, Philippines - Mipas-an og duha ka lingkoranan sa semifinals si Elgy Dasian human sa iyang kadaugan sa unang adlaw sa 18th Gullas Cup tennis tournament  kagahapon didto sa Cebu International Tennis Centre Inc.-Consolacion Tennis Club sa Laray, Consolacion.

Si Dasian midaog batok ni   Cherry Mae  Toledo, 6-2, 6-0 sa girls' 18-under. Sunod niyang sangkaon si Kezia Jabines, kinsa mipukan ni Kristina Dicdican, 6-1, 6-0.

Midaog usab si Dasian sa ikaduha niyang duwa batok ni Sallydine Siso, 6-0, 6-4 sa girls' 21-under division.

Ang manghod ni Sallydine nga si Sally Mae Siso sa University of San Carlos miabante sab sa semifinal round dihang midaog kini batok ni Christine Bellita sa University of the Visayas (UV), 6-1, 6-0.

Harungon sunod ni Sally Mae mao ang taga-Tacloban nga si Grace Melchor nga midaog sa duwa niya batok ni Mary Clare Lazaga, 7-5, 6-4.

Sa laing bahin, si Jana Pages walay kukaluoy nga midemolis ni Joy Marie Colonia, 6-0, 6-0 aron moabante sa penultimate round sa girls' 18 category.

Nahitsas na sab ang semifinalists sa girls 12 division dihang midaog silang Cristella Sampan, Mary Nathalie Cobarde, Pherl Bless Coderos ug Tamara Suquib.

Nakakuha sab og lingkoranan sa semis silang Elijah Arevalo ug Kristin Renee Salimbangon human gipilde ang tagsa-tagsa nilang kaatbang. Si Arevalo mibuntog ni Francis Lambayan, 6-3, 6-1 sa boys' 16-under class, samtang si Salimbangon midaog batok ni Tamara Kaye Suquib, 6-1, 6-0.

Sa girls' 16 class, si Beverly Eneriquez mipukan ni Marie Andre Danica Toledo, 6-0, 6-0 aron moabante sa quarterfinal round. Sa  boys' 16, si Christopher Encarnacion mibuntog ni Francis Navales, 6-2, 6-3, si Jermaine Laurel miposte og 6-3, 6-1 nga kadaugan batok ni Flame Sotto, midaog sab si Mark Anthony Bienes batok ni John Ibones, 6-1, 6-0, samtang si Andrei Rodriguez mipilde ni Francis Pepito, 6-2, 6-0.