Sugdan na ang lahugay

CEBU, Philippines -  Ang gipaabot nga 2013  Cebu Customs Invitational Tournament buksan na karong alas-6 sa gabii didto sa

Benedicto College gym sa A.S. Fortuna St., Mandaue City.

 Adunay 10 ka teams nga mosalmot gikan sa private ug government sectors ang mag-ilog sa korona sa labing

unang Invitational basketball tournament nga gipasiugdahan ni Bureau of Customs (BOC) Deputy District Collector Bingo

Matugas.

 Si BOC Deputy Commissioner Juan Lorenzo Tañada maoy gidapit isip guest speaker sa opening ceremonies.

 Matud pa ni Matugas nga iyang gipasiugdahan ang maong torneyo aron adunay kalingawan ug magpadayon

ang panaghigalaay sa mga sakop sa BOC ug ingon man aron pabiling  himsog ang panglawas.

 Ang 10 ka teams gibahin ngadto sa duha ka grupo. Ang mga teams nga nasakop sa Group A mao ang BOC,

BIR, CCBI Brokers, MJDL Titans ug ALIN Golden Lions. Sa Group B mao ang IBP, Solarlink/USC ’86, PHIC, CIPU

Warships ug Global Rollway Warriors.

 Ang mga teams sa matag bracket mopailawom og double round robin classification phase diin ang top four

teams sa matag grupo moabante sa crossover quarterfinals ug ang mas taas og seeding maoy makakuha’g twice-to-beat

advantage.

 Ang semifinals himuon nga usa ka knockout affair samtang ang finals ipaagi sa "best-of-three" series.

 Ang mga duwa himuon matag Martes ug Miyerkules didto sa Benedicto College gym. (BANAT NEWS)