FYA solo leader sa cipu, 2-0

CEBU, Philippines - Mikulit sa ikaduha nilang daog ang F. Llamas Youth Association (FYA) Selection human ilang gilubong ang Canillas Customs Brokerage sa iskor, 68-52 kaniadtong Sabado atol sa nagpadayong 2nd season sa Cebu International Port Users (CIPU) didto sa barangay Tisa gym, ning dakbayan.

Ang trapping defense sa FYA nga gipasiugdahan sa abtik nilang point guard nga si Baeng Medalle maoy nakaguba sa diskarte sa CCB ug nakapaluya sa ilang opensa tungod kay maglisod sila'g labang sa midcourt ug kung ugaling mulampos man sila paglabang, adto sab sila madiskuhedo sa half-court set diin dili gani usahay makahimo'g tirada ang CCB tungod kay mailogan na sila sa bola.

Si Tata Laborte maoy nangu sa FYA sa iyang 24 puntos ug midugang si Medalle og 14 puntos samtang ang manghud ni Laborte nga si Nico, miamot og 11 puntos aron maghupot og 2-0 nga baraha.

Ang CCB kinsa maoy defending ug inaugural champion, adunay 1-1 nga baraha. Hinuon, wala makaduwa alang sa CCB ang top point guard sa CIPU nga si Kenneth Kernn Sesante tungod kay nagkadungan ang skedyul sa CIPU ug sa pagbukas sa 10th season sa Integrated Bar of the Philippines (IBP) basketball league didto sa Capitol Parish gym niadtong Sabado.

Nahimong prayoridad ni Sesante ang IBP tungod kay ang iyang team nga Dissenters maoy host sa torneyo karong tuiga.

Sa sayo pa, gisubhan og kulbahinam nga kadaugan ang Mac Nels Brokers dihang naka-ipsot sila batok sa Avenido Brokers, 73-70. Parehong may duha ka players gikan sa Mac Nels ug Avenido ang mibahug og double figures.

Sa kataposan  ug ikatulong duwa niadtong Sabado, mikulit sa una nilang daog sulod sa duha ka duwa ang Ynah Brokers ni team owner Edwin Carmen human ilang gilampurnas ang Gonzales Brokers, 64-46.

Susama sa CCB, ang kakuwang og maayong point guard maoy hinungdan nga naglisod ang Gonzales Brokers ilabi na kay wala sab sila mag-igo sa gawas ug nakasinati sab og daghang turnovers.

Si Crisanto Manulat kinsa maoy naghatag og labad sa ulo ngadto sa Gonzales Brokers, maoy nangu sa Ynah Brokers sa iyang 28 puntos.

Si Art Gonzales mihimo'g sayis puntos ug may pipila ka rebounds alang sa iyang team kinsa aduna karo'y 0-2 nga baraha.