10th season sa IBP Caging sugdan ugma

CEBU, Philippines -  Gilauman nga dakung kalihukan ang masaksihan sa pagbukas

sa 10th season sa Integrated Bar of the Philippines (IBP) Basketball League nga sugdan ugma didto sa Capitol Parish gym

sa dalan Escario, ning dakbayan.

 Sa gipahibalo sa mga organizers atol sa press conference kagahapon didto sa Ocean Garden Seafood

Restaurant sa Brgy. Lahug,  adunay walo ka mga teams ang mopakita'g aksiyon ning upat ka bulan nga torneyo nga

pangulohan sa defending champion Pañeros ug sa one-time grandslam winner Super Idols.

 Lain pang mosalmot mao  ang Dissenters, Primos, Bhutakalz,  Eagles, Lex Titans ug Pecandela.

 Ang host team Dissenters pangulohan sa ilang governor Mark Wernes J. Rosal  uban ni Jonas A. Asis ug

Kenneth Kernn A. Sesante isip league commissioner ug tournament coordinator.

 Mitambong sab ang presidente sa IBP-Cebu City chapter nga si Atty. Ellen Bathan ug ang presidente sa

IBP-Cebu Province chapter nga si Atty. Erwin Heyrosa.

 Matud pa ni Atty. Asis, nga ang torneyo mosubay og single round robin format sa elimination round. Ang top

four teams sa upper bracket ug ang laing upat sa lower bracket mopailawom og laing round robin alang sa sunod nga

hugna.

 Ang top three finishers sa upper bracket moabante sa semifinals, samtang ang No. 4 seed makigtigi batok sa

top qualifier sa lower bracket, nga magsilbeng  wildcard entry alang sa ikaupat ug katapusang luna sa semis.

 Sa crossover semis, ang top-ranked team makigsangka batok sa No. 4, samtang ang No. 2 ug No. 3 qualifiers

magtinaktakay sab. Ang mga mananaog magsangka alang sa kampiyonato.

 Adunay mubong programa nga pagahimuon sa alas-10 sa buntag sa dili pa ang duwa nga sugdan sa ala-1 sa

hapon. (BANAT NEWS)