Pineda hari sa tuburan Motocross

 CEBU, Philippines - Numero unong rider gikan sa Mindanao nga si Kimboy Pineda maoy nangu sa mga mananaog sa Keiz BJ and Phoenix Cyclomax Titan Invitational Motocross niadtong Domingo didto sa Tuburan, Cebu.

 Si Pineda maoy nanghawod sa expert division, samtang ang Sugbuanon ug crowd darling John Flores miokupar sa ikaduha nga dapit, gisundan ni Fil-Am rider Scott Remi.

 Ang race organizer ug Keiz BJ Motors big boss nga si Siegfred Ornopia ug iyang masaarong mga anak ang midaog sab og championship title sa ilang tagsa-tagsa ka dibisyon.

 Si Siegfred mipuhal nilang Russel Gungob ug Jun  Enriquez aron sakmiton ang kampiyonato sa  executive  A.

 Dobleng selebrasyon kini alang ni Ornopia, kinsa naghari   siya sa Asian veteran category atol sa FIM Asian Motocross Championships sa miaging semana didto sa Puerto Princesa, Palawan.

 Ang kinamaguwangang anak ni Siegfred nga si Brylle Ornopia naghari sa mini 85cc class, iyang gipilde ang kapareha niya'g abilidad nga si Gyle Aguilar ug JP Cuesta aron masakmit ang korona. Ang manghod niya si Keizer Ornopia mao sab ang kampiyon sa  65cc. division dihang iyang gipilde ang iyang maguwang nga si Ken-Ken. Si Keizer mao sab ang kampiyon sa 65cc sa FIM Asian Motocross Championships sa Palawan.

 Sa local enduro, si Clinton Gualiza maoy nakatag-iya sa korona, samtang sila si John Hisoler ug Alex  Abalo miangkon sa mosunod nga duha ka luna. Si Russell Gungob naghari sa executive B, gisundan ni Amay Amon ug Jun Enriquez alang sa ikaduha ug ikatulo nga puwesto.

 Midaog sab og korona si Denmark Supatan dihang naghari siya sa beginner's open production. Ang igsuon ni Kimboy nga si Jesse Pineda mao sab ang nanghawod sa intermediate division. Sila si John  Flores ug Scott Remi miangkon sa ikaduha ug ikatulong dapit.

 Sa makalingaw nga lumba, si Butch Pangagsa Flores maoy labing kusog sa mga indigay sa "wanggits" category, gisundan sa Amerikanong si Ray Bosh, Byoping Chua, Rowell Maraño ug Reynante Tigue.

 Ang top three finishers sa "habal-habal" category mao sila si Willie Borces, Jappet Pestrano ug Clinton Gualiza.

 Ang usa ka adlaw nga kalihukan gidumala ni race consultant Ellen Ornopia ug technical committee chief Mark Paunel sa abag nilang Orting Lauranilla, Romeo Colina, Roland Rosellosa, Diomedel Boto, Titing Lumapas ug Tilaok Misa.

 Nagmalampuson ang maong kalihukan pinaagi sa mainitong suporta ni Tuburan Mayor  Aljun    Diamante, Brgy. Capt. Wilfredo Diamante, Danilo Diamante, Jordan 'Celebrity' Herrera, Jeoffrey Viñalon sa  Phoenix Cyclomax Titan, Joseph Pepito, Edmund Pingkian sa Haojue Philippines ug RMO Motor. (BANAT PALARO)