Alvarado mibawos,Pacquiao isunod ?

CEBU, Philippines - Laing brutal ug kulbahinam nga sangka ang nahitabo sa ikaduhang panag-abot nila ni Mexican American Mike Alvarado ug karibal nga si Brandon Rios kagahapon didto sa Mandalay Bay Hotel and Casino sa Las Vegas.

Apan ning higayuna, milampos si Alvarado sa iyang tinguha nga makabawos ni Rios human siya maoy midaog pinaagi sa 12-round unanimous decision aron pagsakmit sa WBO light welterweight title.

Sa usa ka sangka nga seguradong kandidato isip ‘Fight of the Year’, gipakita sa duha ka boxing superstar ang ilang kaisug human way hunung sila nga nagbinayloay og kusug nga mga kinumo sugod sa una hangtud sa ika-12 nga round.

Nakahimo pagpasud og mga solido nga sukmag si Rios nga mipabarag ni Alvarado sa sayung bahin sa away, apan mas mipatigbabaw ang inutok nga istilo ni Alvarado aron lupigon sa puntos si Rios.

Human sa 12 rounds, tulo ka mga hurado ang mihatag og 115-113, 115-113 ug 114-113 tanan ngadto ni Alvarado.

Sa una nilang sangka niadtong Oktubre, si Rios midaog human niini gipaundang sa seventh round si Alvarado.

Mihagad dayun og rematch si Rios human gideklarar nga mananaug si Alvarado ug dali ra usab kining gidawat sa nauwahi.

Apan si Top Rank Inc. CEO Bob Arum nagkanayon nga mahitabo ang rematch, apan iparang una og lain nga mga boksidor ang duha diin posible nga sangkaon ni Alvarado si Filipino boxing superstar Manny Pacquiao. (BANAT NEWS)