Miami maka-37?

CEBU, Philippines - Dili malalis nga ang defending champion Miami Heat maoy usa ka gika-intapan nga team karon sa NBA ug bisan ang mga kontra sa Heat angayan makurat niining ilang 25-game winning streak ug posible kining mahimong 26 karong adlawa sa higayon nga modaug sila batok sa mas huyang nga Charlotte Bobcats.

Ang puntariya karon sa Heat mao ang pag-apas sa NBA record 33 ka sagunson nga daog nga gihuptan sa 1971-72 Los Angeles Lakers nilang Kareem Abdul Jabbar, James Worthy ug Earvin "Magic" Johnson.

Kung atong subayon ang kasaysayan, dunay duol nga kalambigitan ang karaang L.A. Lakers ug ang init kaayong team sa bag-ong henerasyon nga Heat ug kini makonektar nako sa usa ka bantugan nga NBA coach nga si Pat Riley.

Kung kahinumdoman, si Riley maoy kanhi coach sa Lakers busa suhito siya sa pagpadagan og sistema sa ilang team ug karon nga mibalhin na siya isip presidente sa Heat, didto niya ibubo ang iyang halapad kaayong kasinatian sa organisasyon sa Lakers.

Sa wala pa makatilaw ug kampiyonato si Erik Spoelstra sa miaging tuig, daan nang gihatagan ni Riley og korona ang Heat sa panahon nilang Shaquille O'Neal, Alonzo Mourning ug Dwyane Wade ug wala pa  silang LeBron James, Chris Bosh ug Ray Allen niadtong panahona.

Mga sports analysts ug mga NBA writers dunay pangagpas nga kung magpadayon  og hakot og dugang daog ang Heat, posibleng ila gyud malabwan ang 33 nga win streak sa Lakers ug maoy ilang pagtuo nga sa dili pa magsugod ang playoffs unya sa Abril 20, moabot na og 37-game winning streak ang Miami. Wow, kakuyaw ani no?

Ako isip usa ka fan sa Oklahoma City Thunder, akong ipadayag dinhi ang akong kumentaryo nga hangtod dili kini matuman, ang Lakers pa gihapon maoy record holder.

Nagsunod karon ang Heat sa Lakers kung winning streak ang hisgotan ug ila nang naapsan ang kanhi 22 nga win streak sa Houston Rockets niadtong 2005 season.

Sulod sa pipila na ka higayon, kanunay masalbar ang Heat gikan sa sikit nga duwa ug dili tungod kay naa silay James ug Wade apan tungod kay nadugang kanila si Bosh ug naa silang Mario Chalmers, Shane Battier ug Allen nga makasuporta sa higayon nga magkalisod na ang opensa sa team.

Bisan silang James ug Wade nagtuo nga sa dili madugay, mapandol ra gihapon sila ug dili lang mahibaw-an kung kanus-a o kung kinsay makapilde kanila.

Ania ang pipila ka mga posibilidad kung kanus-a o kung asa ug unya unsang team ang mobaraw kanila.

Mahimong ugma lang kutob ang streak sa Heat didto sa ilang silingan sa Orlando diin ilang ikasangka ang Magic. Niining bag-o nilang panagbagat sa miaging Marso 6, si James maoy misalbar sa Heat sa iyang basket sa nahibiling 3.2 segundos ug didto kini mahitabo sa Miami.

Tungod kay adto man kini duwaon sa Orlando, posibleng mobawos ang Magic ilabi na kay gikan sa biyahe sa Charlotte ang Heat. 

Sa higayon nga ilang mapilde ang Magic ugma, ang streak moabot na ngadto sa 27.

Posible sad kining mahitabo unya sa Marso 31 didto sa San Antonio atol sa Easter Sunday diin tumong sa Heat ang ilang ika-30 nga streak. Ang Heat igo lang naka-ipsot batok sa Spurs didto sa Miami niadtong Nobiyembre bisan og wala silang Tim Duncan, Manu Ginobili, Tony Parker ug Danny Green. Mao sab kadtong tungora nga gimultahan ang Spurs ug $250 mil dolyares tungod kay ilang gituyo pagpapahuway ang ilang mga starters.

Kung ugaling makalusot sila batok sa Spurs, posibleng mapilde sila didto mismo sa ilang korte sa Miami dihang sulngon sila sa New York Knicks unya sa Abril 2 ug ang kataposang tsansa nga ilang makuha ang ika-37 nga streak kung modaug sila didto sa Cleveland, ang kanhi team ni James unya sa Abril 15.