Nuggets naka-15 na, clippers daog vs. nets

CEBU, Philippines - Wala matarug ang Denver Nuggets sa gipakitang kalig-on sa Sacramento Kings kagahapon aron mokulit og 101-95 nga kadaugan ug miinat sa ilang winning streak ngadto sa sagunson 15 ka daog nga hayan makapakurat sa ubang team atol unya sa playoffs.

Matod pa ni Denver coach George Karl nga iyang gibauran ang iyang team nga dili mahimong adunay players nga mo-relax ug moreklamo nga adunay gibating piang ug kakapoy.

''If we had a bunch of 30-year-olds I might have a different opinion but we have a bunch of 25-year-olds.''

Matod pa ni Karl human lang motabla ang Nuggets sa ilang franchise record alang sa sagunson nga kadaugan nga gihimo kaniadto sa Denver Rockets sa 1969-70 ABA season.

Ang kadaugan maoy naghatag sa Nuggets ngadto sa ikatulong pwesto diin ilang naapasan ang  Memphis ug ang Los Angeles Clippers.

''He was not happy with us, he was pretty mad with us,'' matod pa ni Danilo Gallinari kinsa maoy nangu sa Denver sa iyang 19 puntos. Suma pa usab ni Gallinari, ''The last two or three games we've been up and down. We've had some good stretches and bad stretches, probably because we're relaxed after all these wins we've had.''

Miamot og 17 puntos si Kenneth Faried alang sa Nuggets kinsa aduna nay 17 ka sagunson nga daog sa ilang homecourt didto sa Pepsi Center.

Ug kini ilang nahimo bisan og wala silang Ty Lawson ug Wilson Chandler kinsa parehong adunay piang.

Silang Lawson ug Chandler parehong dunay dakung papel alang sa winning streak sa Denver ug silang duha maoy responsable dihang midaug ang Denver batok sa Oklahoma City niadtong Marso 1.

Sa laing bahin, human lang sila nakasinati og 4-4 nga record sa miagi nilang walo ka duwa, nag-ayo ang tono sa duwa sa Los Angeles Clippers dihang ilang gipukan ang Brooklyn Nets ug sulagma kaayo nga parehas ang ilang score sa Denver, 101-95.

    Si Cris Paul maoy nangu sa Clippers sa iyang 29 puntos, ang 17 niini didto sa fourth quarter.

 ''A lot of these games we've been letting get away from us. Tonight we found a way to get stops when we needed and we got some big buckets when we needed them," matod pa ni Paul.

    Mihimo sab og 12 sa iyang 13 ka free throws si Paul ug may 11 ka assists samtang nakigtakos siya batok kanilang Deron Williams.

Silang Willie Green ug deAndre Jordan midugang og 15 ug 13 puntos, matag usa alang sa Clippers ug miamot si Blake Griffin og 11 puntos alang sa ilang 28-8 mga record sa ilang homecourt ug mao sab kadto ang ilang franchise-record nga sagunson 10 ka daog batok sa mga teams gikan sa Eastern Conference.

Ang Nets gipangulohan nilang Brook Lopez ug Williams kinsa parehong miposa og 18 puntos.