24th Mitsubishi Lancer Netfest: Lim, Mendoza tandem namaalam na rin

MANILA, Philippines - Hindi napigil nina Alberto Lim at Jurence Mendoza na mag-error sa mahala­gang super tie-break upang lasapin ang 6-7(9), 6-1, 8-10, pagkatalo kina Sumit Nagal ng India at Trongcharoenchaikul ng Thailand sa 24th Mitsubishi Lancer International Junior Tennis Championships boys’ doubles kahapon sa Rizal Memorial Tennis Center.

Umangat na sa 8-5 sina Lim at Mendoza nang sumablay ang kanilang mga returns para makaba­ngon ang dayuhang ka­­­tunggali.

Si Trongcharoenchaikul na 93rd ranked player sa mundo ang siyang nagbi­gay ng panalo gamit ang ace at matikas na backhand.

Hindi naman masasa­bing sayang ang ipinakitang laban ng 13-anyos na si Lim at 16-anyos na si Mendoza dahil ito ang unang pagkakataon na nagtambal sila sa doubles.

Sa pagkatalong ito, tuluyang natapos na ang kam­panya ng dalawang junior netters ng Pilipinas dahil talsik na rin sila sa boys’ singles.

Si Lim ay sumuko kay 14th seed  Duck Hee Lee ng Korea, 6-7 (5), 6-7 (3), habang si Mendoza na ranked 54th sa mundo, ay natalo sa French qualifier na si  Alexandre Muller, 6-4, 3-6, 2-6, na nangyari noong Miyerkules.