Casimero nagpasalamat sa suporta
CEBU, Philippines - Dakung pasalamat ni IBF light flyweight champion Johnriel Casimero sa grabeng suporta nga iyang nadawat
gikan sa mga Pinoy alang sa iyang malampusong title defense niadtong Domingo batok ni Panamanian Luis Alberto Rios
didto sa Megapolis Convention Center sa Panama City.
Matud ni Casimero, nga bisan pa'g didto himoa ang away sa balwarte sa iyang kontra, madasigon gihapon siya
nga miaway tungod sa iyang tahas nga makahatag og laing dungog sa nasud.
Ang 22-anyos nga world champion midaog pinaagi sa 12-round unanimous decision, 119-109, 119-109 ug
118-110.
"Gawas sa akong manager (Sammy Gello-ani) ug coach (Christopher Tepora), gusto ko magpasalamat sa
tanan nakong mga kababayan nga misuporta ug miampo sa akong kadaugan," matud pa ni Casimero.
"Malipayon ko nga nakahatag na usab ako og dungog sa nasud," dugang pa ni Casimero.
Ang produkto sa Omega Boxing Gym nga si Casimero misaysay nga gusto unta niya nga mohimo og
impresibong kadaugan, apan nakapaduka ang ilang sangka kay nagmakuli si Rios sa pakigsinukliay og kumo.
"Sige man lang siya (Rios) og depensa, maglisud ko og sulod kay taas siya, pero mas ganahan unta ko og
exciting nga away ato tungora," pasabot ni Casimero.
Mao kadto ang ikaduhang malampusong pagdepensa ni Casimero sa iyang bakus human kini niya masakmit
niadtong Pebrero sa miaging tuig pinaagi sa 10th round TKO batok ni Argentinian Luis Alberto Lazarte didto sa
Argentina.
Una niadtong Agosto sa miaging tuig pinaagi sa "unanimous decision" batok ni Mexican Pedro Guevara didto
sa Mexico. (BANAT NEWS)
- Latest
