Fajardo may pinatunayan na

MANILA, Philippines - Bagamat naglaro nang walang import, nagawa pa rin ng Petron Blaze na manaig laban sa Rain or Shine noong nakaraang Sabado sa likod na rin ng pagbibida ni rookie June Mar Fajardo.

Humakot ang 6-foot-10 na si Fajardo ng 20 points, 13 rebounds, 2 assists at 1 shotblock para tulungan ang Boosters sa 87-79 pa­nalo laban sa Elasto Painters at hirangin bilang Accel-PBA Press Corps Player of the Week.

Inasahan na rin ni Petron coach Olsen Racela na mamamayagpag ang 23-anyos na Cebuano.

“It’s a testament to how he works hard. Even after practice he spends extra hours para ma-hone iyung game niya. Iba talaga iyung drive ni June Mar,” wika ni Racela.

Hindi rin dapat ipagtaka ang pag-usbong ng talento ng top draft pick overall dahil na rin sa pagtuturo sa kanya ni two-time Most Va­luable Player  Danny Ilde­fonso.

“June Mar admittedly looks up to Danny I and who better to teach him than Danny I?” sabi ni Racela.

Nagtatala si Fajardo ng mga averages na 10.0 points at 7.5 rebounds per game para sa Petron, inaasahang tutulungan ni balik-import Rodney White bilang kapalit ng napatalsik na si Renaldo Balkman.

“There’s no rush,” ani Racela. “That’s why you see him playing a lot of minutes one game and hindi mas­yado another game. But he is steadily getting there.”