Utah naka-upset

CEBU, Philippines - Migamit ang Utah Jazz og 8-0 run sa fourth quarter lakip ang three-pointer ni Gordon Hayward aron mokulit og 90-84 nga kadaugan batok sa Memphis Grizzlies kagahapon sa duwa sa NBA didto sa EnergySolutions Arena sa Salt Lake City, Utah.

Gihimo sa Grizzlies ang tanang paagi sa paningkamot hangtod gani nga natangtang ang sapatos ni Marc Gasol tungod sa paningkamot nga modaug atol sa ilang ika-upat nga duwa sulod sa lima ka  gabii.

''It showed how physical the game was,'' matod pa ni Paul Millsap kinsa mihimo'g 13 puntos ug may walo ka rebounds apan si Hayward maoy nangu sa Jazz sa iyang 17 puntos. ''A guy loses his shoe, he picks it up, plays defense,'' matod pa usab ni Millsap nga nagtumbok kang Gasol.

Gitawagan og personal foul si Gasol atol sa usa ka play dihang iyang gihapak og sapatos si Derrick Favors samtang mi-drive ang Jazz third-year power forward sa sayong bahin sa fourth quarter diin naglabaw ang Jazz og kuatro puntos.

 Matod pa gyud ni Mo Williams nga angayan gyud untang ma-eject si Gasol bisan pa og bola ra unta maoy iyang tuyo sa paghapak sa sapatos.

Ang  three-point play ni Gasol sa may 4:24 ang nahibiling oras maoy nagpasikit sa Memphis ngadto sa 76-79 apan mibawos og sagunson singko puntos si Millsap ug nakaigo og tres si Hayward aron molabaw ang Jazz sa iskor, 87-76.

Si Jerryd Bayless, kinsa maoy nangu sa tanang scorers sa iyang 24 puntos, misuway unta pagbaswat sa Grizzlies dihang mibahug siya'g sagunson otso puntos lakip ang back-to-back triples apan nakahimo siya'g turn over sa sunod nilang ball possession sa nahibiling 38 segundos ug misukli si Hayward og three-pointer aron salbaron ang Jazz kinsa biya na lang og tunga sa duwa tali sa Los Angeles Lakers alang sa ikawalong pwesto sa Western Conference playoffs.

 Ang Jazz aduna na karo'y 34-32 nga baraha samtang ang Grizzlies adunay 44-21 nga baraha.