Talisay beach volley sugdan karon

CEBU, Philippines -  Sugdan na ang aksiyon sa    Talisay City Invitational Beach Volleyball Competition karong alas-8 sa buntag didto sa Talisay Liberation Park sa Brgy. Poblacion sa maong siyudad.

 Ang  torneyo magsilbeng tune-up  sa  mga collegiate teams alang sa  Visayas leg sa Nestea Beach Volley nga gikatakda  sa  Marso  22  didto sa lungsod sa Moalboal.

 Ang torneyo  nga gibahin sa men’s ug women’s division  salmotan sa mga koponan gikan sa Southwestern University (SWU), University  of  San Carlos (USC), University of Southern Philippines Foundation  (USPF),  University of  San  Jose-Recoletos (USJ-R) ug University of Cebu (UC).

 Ang mga koponan magtigi   pinasubay sa single round robin elimination.

 Karong adlawa magtigi ang men's division, samtang ugma ang aksiyon sa women's class.

 Ang   top  two   team maoy mag-ilog sa kampiyonato nga gitakda sa Marso 26 dungan sa pagsaulog sa siyudad sa Talisay sa  "Takas sa Talisay."

 Gipasiugdahan sa Talisay City Sports Commission (TCSC) uban sa suporta sa kagamhanan sa dakbayan sa Talisay, ang mokampiyon    mobulsa og P5,000,samtang ang second placer makaangkon og P3,000.

 Ang non-winning teams makadawat og P1,000 nga consolation prize. (BANAT PALARO)