Heat nagkainit

CEBU, Philippines -  Milanat na ngadto sa  20 ka sagunson nga daog ang nahimo sa Miami Heat ug maoy ikaupat nga team sa kasaysayan sa NBA nga mikulit sa maong gidaghanon sa daog sa usa ka season.

 Si LeBron James maoy nangu sa Heat  nga mirehistro og  27 puntos, apan ang mga crucial baskets ni Dwyane Wade maoy nakasalbar nila aron moiskor og daog batok sa Philadelphia Sixers, 98-94 sa ilang duwa kagahapon didto sa Well Fargo Center, ang homecourt sa Sixers.

 Upat lang ka laing teams ang mirehistro og labing menos 20 ka sunod-sunod nga daog sa usa ka season. Ang labing daghan 33 ka daog nga nahimo sa  Los Angeles Lakers niadtong 1971-1972, Houston Rockets nga adunay 22 ka daog niadtong 2007-2008 ug  Milwaukee Bucks sa ilang 20 ka daog nga ilang nahimo niadtong 1970-1971 ug Heat nga posibleng mapun-an pa.

 Si Thaddeus Young maoy nangu sa Sixers sa iyang 24 puntos uban ang 15 ka rebounds.

 Posible ang kakapoy maoy rason nganong wala malubong sa Miami ang Sixers, kinsa mihimo'g 16-8 run sa third quarter aron mosikit sa iskor, 66-71. Misikit pa kini ngadto na lang sa usa ka lugas, 82-83 human sa three-pointer ni Jrue Holiday sa nahabiling 5:26 sa duwa nga nakapahugyaw sa mga dumadapig sa Sixers.

 Gipahilum ni Ray Allen ang katawhan pinaagi sa iyang triple alang sa 89-86 nga abante ug nasundan kini sa basket ni Chris Bosh aron moposte og 91-89 nga labaw. (BANAT NEWS)