Valero mi-iskor og TKO batok ni Ricablanca

CEBU, Philippines - Usa ka right uppercut ang gipatugpa ni Gerpaul ‘TI Yamagata’ Valero ngadto sa lawas ni Jonathan Ricablanca kinsa nahagsa sa fourth round atol sa ilang sangka niadtong Sabado sa gabii didto sa  Panphil B. Frasco Memorial Sports Complex sa Liloan, Cebu.

Mipakita dayun sa iyang kaagresibo si Valero sa pagbukas sa away diin gihinay-hinayan niya paglata si Ricablanca gamit ang iyang mga bangis nga kombinasyon sa ulo ug lawas ni Ricablanca.

Gitapos ni Valero ang away pag-abot sa fourth round dihang usa ka uppercut sa lawas iyang gibuhian nga mipalup-og sa hingpit ni Ricablanca.

Sa maong kadaugan si Valero misaka ngadto sa 14-14, 10KOs, samtang si Ricablanca nakahiagum sa iyang ika-40 ka pilde sud sa 46 ka away.

Sa supporting bout, si Rajah Ranoel Pael midaog pinaagi sa unanimaous decision batok ni Ryan Bongcawil, samtang si Jayson Redondo Singwangcha mipatug usab ni Elmer Colve sa second round.

Mokumpleto sa lista sa mga mudaog mao sila si Ardie Boyosi Singwangcha batok ni Jeffrey Jimenez, Rodel Wenceslao batok Sesustener Llanera Singwangcha, Neil John Tabanao Singwangcha batok Ryan Quimbo, Kenny Demecillo Singwangcha batok Bryan Samson ug Joey Canoy Singwangcha batok Keith Batolenyo.