MBD kampiyon sa 6th fya season

CEBU, Philippines - Ang tagsa ka free throws gikan nilang Dandan Enriquez ug Nico Laborte maoy misalbar sa top seed MBD Law Firm aron maka-ipsot ngadto sa upset sa no. 3 Pastrano's Special Chicharon ug mikulit og kulbahinam nga 75-73 nga kadaugan sa finals aron sakmiton ang korona sa 6th season sa F.Llamas Youth Association (FYA) kaniadtong Biyernes sa gabii didto sa barangay Tisa gym, ning dakbayan.

Si Enriquez nga maoy labing sinaligang player sa MBD, misipyat ug usa sa iyang duha ka free throws aron hatagan og usa ka palitong abante ang iyang team, 74-73 may 24.9 segundos pa ang nahibiling oras.

May higayon pa untang modaug ang Pastrano's apan natawagan og travelling violation ang ilang point guard nga si Ariel Mayol ug sa pagbalik sa ball possession ngadto sa MBD, ilang gi-foul si Laborte kinsa misiyat sab og usa sa iyang duha ka free throws aron himuong 75-73 ang iskor sa nahibiling 2.7 segundos.

Sa ilang kataposang pagsuway nga tablahon ang duwa, misipyat ang Pastrano's kinsa mihuwam kang Noel Medalle isip ilang coach human mapilde ang Simple Likes sa ilang sangka sa ikatulong pwesto batok sa GCM, 93-105.

Si Enriquez kinsa maoy nangu sa MBD sa iyang 28 puntos,  maoy napiling MVP  samtang si Ariel Villordon sa Simple Likes maoy gitugyanan sa Sportsmanship Award.

Silang Janus Abellana ug Jaz Sydiongco parehong mibahug og 15 puntos aron pangulohan ang Pastrano's.

Silang Enriquez, Baeng Medalle, Abellana, Mayol ug Ryan Villaver maoy napiling sakop sa Mythical Five.

Sa sayo pa, si Jimmy Tapdasan maoy nangu sa GCM human sila mohakot og 24 puntos samtang si Ryan Villaver maoy nangu sa Simple Likes sa iyang 24 puntos, midugang og 15 puntos si Noel Medalle ug silang Michael Garcia ug Villordon miambit og 15 ug 14 puntos.

Tulo ka sakop sa FYA ang gibuk-an og hilaw nga itlog sa ilang ulo isip tradisyon matag adunay membro nga magsaulog sa ilang adlaw'ng natawhan. Sila mao si Lito Mirasol niadtong Marso 7, Abellana  niadtong Marso 8 ug si Tonyo Abella karong adlawa.

Puntos matag usa:

 GCM (105)—Tapdasan 24, EJ Fernandez 17, Avila 16, Laborte 14, Monte 8, Oropa 7, E. Fernandez 6, Arregadas 6, Bosysill 1

Simple Likes (93)—Villaver 24, N. Medalle 15, Garcia 14, Villordon 14, Mirasol 12, Cueme 10, Dacayana 4

Second Game:

MBD (75)—Enriquez 28, B. Medalle 13, N. Laborte 11, Arreglo 8, Asongsong 5, Antiporta 3, Canete 3

Pastrano's (73)—Abellana 15, Sydiongco 15, Dacayana 12, Abella 11, Lavandero 10, Mayol 9.