All-Women 50K night race mosikad karon

CEBU, Philippines -  Managan na ang kapin sa 100 ka kababayen-an uban ang katuyoan nga mahuman nila sud sa 10 oras ang 50 kilometros  nga   lumba.

 Mosikad kini karong gabii hangtod na sa pagka buntag sa adlaw'ng Domingo.

 Ang mga partisipante moagi sa mga dagkung kadalanan sa siyudad sa Sugbu, Mandaue ug Lapu-Lapu sa panggabii nga lumba nga uloha'g All-Women Ultra Marathon (AWUM).

 Ang pagpahigayon sa AWUM nga anaa sa ikaduhang tuig gipahaom sa pagtimaan sa International Women's Month ning bulan sa Marso.

 Sugdan kini sa alas-10 sa gabii diha sa Plaza Independencia sa siyudad sa  Sugbu ug matapos sa Cebu White Sands Resort and  Spa sa Maribago sa dakbayan sa Lapu-Lapu.

 Diyes oras ang cut-off time o kinahanglan ang mga partisipante moabot sa finish line sa alas-8 sa buntag sa adlaw'ng Domingo. Adunay pamahaw ang giandam sa kagamhanan sa dakbayan sa Lapu-Lapu alang sa mga runners didto sa White Sands.

 Walay ganting salapi, apan ang top finishers makadawat og gift certificates nga overnight stay sa usa ka mahalon nga hotel didto sa Mactan. Ang kampiyon koronahan isip "rayna".

 Ang AWUM Queen makadawat og korona, baston ug kapa. Si Merlita Dunkin maoy hara sa miaging tuig.

 Imbes mga medalya, ang AWUM finishers makadawat og personalized plaque matag usa.

 Ang AWUM gipasiugdahan sa Think  Tank, usa ka non-profit nga grupo sa Cebu-based Ultramarathoners ug mao usab ang grupo nga nipasiugda sa 100-kilometer series.

 Modumala sa kalihukan mao si race director Joel Juarez ug abagan kini sa Lapu-Lapu Amateur Radio Society and Emergency Network (LARSEN). (BANAT PALARO)