Kamangay na
CEBU, Philippines - Oras na ni ALA Boxing Gym superstar Donnie 'Ahas' Nietes nga atubangon ang labing lisud niya nga hagit sa iyang karera sa pagdepensa niini sa iyang WBO light flyweight title batok ni Mexican champion Moises Fuentes sa main event sa "Pinoy Pride XVIII: World Champion vs. World Champion" karong gabii didto sa Pacific Grand Ballroom sa Waterfront Cebu City Hotel and Casino.
Sayod si Nietes (31-1-3, 17KOs) nga dili sayon ang iyang sagubangon batok sa mas taas nga si Fuentes (26-
1, 20KOs), apan nakaseguro siya nga dili mailog ang iyang bakus sa bisitang boksidor.
Si Nietes dunay gitas-on nga 5-foot-3 mas mubo itandi ni Fuentes nga nagbarog og 5-foot-7.
"Ready na gyud ko, wa ko mabalaka kung mas taas siya, mas nindot hinuon na para makapasud ko's akong uppercut," matud pa ni Nietes atol sa official weigh-in kagahapon didto sa The Event Centre sa SM City-Cebu.
Sila si Nietes ug Fuentes parehong mitimbang og 108 lbs. ug nagpasabot kini nga andam na sila sa ilang away karon.
Sa iyang bahin, si ALA chief trainer Edmund Villamor miingon nga andam na ang ilang game plan alang sa maong away ug iyang isalig ang tanan ngadto ni Nietes.
Si Fuentes, ang WBO minimumweight king sa wala pa misaka og timbang nanganti nga iyang huboan sa bakus si Nietes ilabi na nga personal nga mosuporta kaniya ang iyang kababayan nga si Mexican legend Marco Antonio Barrera.
"I will leave Philippines with his (Nietes) belt," matud pa sa 27-anyos nga si Fuentes.
Sa supporting bout, ang undefeated WBO Asia-Pacific super bantamweight title-holder nga si Genesis 'Azukal' Servania (19-0, 6KOs) mosuway paghimo og knockout nga kadaugan batok sa delikadong Indonesian veteran nga si
Angky 'Time Bomb’ Angkota (26-8, 14KOs).
"Dili lang ko mosaad pero kung makakita og abli sa iyang depensa ako gyud siyang tumbahon," matud pa ni Servania.
Lain usab nga atngan mao ang sangka ni kanhi OPBF champion Jimrex 'Executioner' Jaca (30-6, 29KOs) ug sa Thai slugger Rachamongkol Sor Pleonchit (13-4, 5KOs). (BANAT SPORTS)
- Latest
