Bulls gipanitan
CEBU, Philippines - Kalit nahimong one-sided game ang kadaugan sa Oklahoma City Thunder batok sa Chicago Bulls, 102-72 kagahapon sa nagkainit nga aksiyon sa National Basketball Association didto sa Chesapeake Energy Arena, Oklahoma.
Gawas nga nangigo sila sa ilang field goals, ang Thunder maayo sab nga nakapatuman sa ilang depensa ngadto sa Bulls.
Si Russell Westbrook maoy nangu sa Thunder pinaagi sa iyang 23 puntos, gisundan ni Kevin Durant nga adunay 19 puntos. Si Serge Ibaka miamot og 17 puntos ug si Thabo Selofosha mitampo og 11 puntos alang sa Thunder, ang No. 2 team sa NBA sa ilang 41-15 nga baraha.
Silang Luol Deng ug Nate Robinson parehong miiskor og 13 puntos alang sa 43-24 nga Bulls, kinsa nakasinati sa labing ngil-ad nilang shooting form kagahapon.
Sa laing duwa, giusikan sa Miami Heat ang ilang 22 puntos nga labaw, hinuon nakarekober gihapon kini human moposte og 109-105 nga kadaugan batok sa Cleveland Cavaliers.
Si LeBron James mipupo og 28 puntos, samtang si Dwyane Wade miani og 24 puntos alang sa Heat nga mikutlo sa ika-11 nilang sunod-sunod nga daog.
Ang Cavaliers gipangulohan ni Dion Waiters, kinsa miiskor og 26 puntos, gisundan ni C.J. Miles sa iyang 19 puntos ug Kyrie Irving nga adunay 17 puntos.
Didto sa American Airlines Center sa Texas, si Kobe Bryant mipabuto og 38 puntos aron pangulohan ang Los Angeles Lakers nga mipukan sa Dallas Mavericks sa iskor nga 103-99.
Sa lain pang mga duwa, ang Golden State Warriors nakaipsot sa Minnesota Timberwolves, 100-99, ang New Orleans Hornets mipilde sa Sacramento Kings, 110-95. Ang Memphis Grizzlies mipukan sa Brooklyn Nets, 76-72.
Gipilde sa New York Knicks ang Philadelphia Sixers, 99-93, ang San Antonio Spurs mibuntog sa Phoenix Suns, 97-87 ug ang Portland Trailblazers mipilde sa Boston Celtics sa iskor nga 92-86. (BANAT SPORTS)
- Latest
