Heat ug Clippers wala kapugngi

CEBU, Philippines - Mikulit na sab og laing triple-double si LeBron James aron tabangan ang Miami Heat ngadto sa 114-90 nga demolisyon batok sa host Philadelphia Sixers kagahapon sa nagpadayong duwa sa NBA regular season.

Mihimo'g 16 puntos si James uban sa iyang 11 ka assists ug 10 ka rebounds alang sa iyang ika-35 nga career-triple-double. Sa wala pa siya palingkora, giseguro ni James nga molangkat siya'g usa ka rebound aron mokulit ug triple-double.

Daan nasayud si James nga niadtong tungora, may siyam na siya ka rebound ug ang three-time NBA MVP milampos sa ika-10 nga rebound human matapal ni Chris Anderson si Evan Turner ug siya maoy milangkat sa rebound.

Mibahug og 33 puntos si Dwyane Wade samtang sila si Mario Chalmers ug Chris Bosh midugang og 14 ug 13 puntos matag usa.

Ang Heat kinsa maoy defending NBA champions aduna na karo'y 39-14 nga baraha ug may lima ka duwa ug tunga batok sa Indiana sa Eastern Conference.

Si Jrue Holiday maoy nangu sa Sixers sa iyang 21 puntos ug si Nick Young miamot og 19 puntos. Ang Sixers adunay labaw nga 3 1/2 games batok sa Milwaukee alang sa ikawalong luna sa East.

Didto sa Staples Center, migamit og 14-0 run ang Los Angeles Clippers sa second half aron pagkontrolar sa duwa ug mikulit og 107-94 nga kadaugan batok sa Utah Jazz.

Sulod sa unang duha ka quarters nagkalisod unta ang Clippers tungod kay igo lang silang milabaw og dos puntos sa halftime, 51-49.

Bag-o lang silang gilubong sa San Antonio Spurs nga maoy labing dakung biya sa Clippers karon nga season.

Sa ilang kadaugan, na-sweep sa Clippers ang Jazz sa labing unang higayon gikan sa 1978-79 season.

Mibahug og 21 puntos si Caron Butler alang sa Clippers, si Griffin may 18 puntos ug si Chris Paul may 11 puntos. Si Lamar Odom mihimo'g 18 puntos gikan sa bench nga maoy iyang labing dakung iskor sulod sa kapin usa ka tuig. gikan sa NBA.com)