CCBI 2-0 na sa HoopStars
CEBU, Philippines - Padayong nagpakita sa ilang labok ang title contender Chamber of Customs Brokers, Inc. (CCBI) human ilang gilubong ang Accenture sa iskor, 90-72 kaniadtong Sabado sa nagpadayong HoopStars 2013 Corporate League didto sa J Centre Mall sa dan A.S. Fortuna, dakbayan sa Mandaue.
Ang CCBI ni coach Caleb Gawangon kinsa gipalig-onan tungod sa presensya ni ex-UC Webmasters skipper Kenneth Kern Sesante, midaug dayon sa ilang debut human ilang gimasaker ang SMY Packaging sa iskor, 87-42 kaniadtong Pebrero 13.
Maayong pagkakatag sa ilang opensa tungod sa mga assists ni Sesante gawas pa sa iyang kontribusyon nga 10 puntos alang sa CCBI ug usa siya sa upat ka mga sinaligan nga mibahug og double figures.
Ang kanhi produkto sab sa UC nga si Daniel Enriquez maoy nangu sa CCBI pinaagi sa iyang 17 puntos.
Silang Beking Rollon ug Baneg Medalle midugang og 16 ug 10 puntos alang sa CCBI kinsa naghupot na karon og 2-0 nga baraha. Maoy tinguha sa CCBI ni team owner Ding Abay-abay ug team manager Rady Abarintos nga sakmiton ang solong liderato batok sa Flying V kagabii apan wala pa hisayri ang resulta sa maong duwa.
Daling naporma ang lig-on nga CCBI team tungod kay parehong hilig sa basketball silang Abay-abay ug Abarintos kinsa suod sab kaayong mga golfing buddies.
Naigo og panagribal lang sa mga UC players ang sangka tali sa CCBI ug Accenture tungod kay ang napildeng team gipangulohan sab sa kanhi Webmaster gunner nga si Archie Batua kinsa mibahug ug 24 puntos.
Ang CCBI nasakop sa Group B kauban ang malig-on nga Philhealth nga gipangulohan ni ex-USPF Panther Elvis Labares ug pipila ka mga contenders sama sa Parklane ug Innodata.
Wala makaduwa alang sa CCBI sa miaging gabii atol sa ilang kadaugan silang ex-Jaguar point guard Gilbert Real ug ex-CIT Wildcat forward Ramil Aninon.
Puntos matag usa:
CCBI (90)--- Enriquez 17, Rollon 16, Sesante 10, B. Medalle 10, N. Medalle 8, Villaronza 8, Abellana 6, Moral 6, Laborte 4, Elloren 3, Palero 2
Accenture (72)--- Batua 24, Loreto 18, Abesia 10, Buligan 5, Batobalonos 4, Magdalaga 3, Tecson 2, Orat 2, Delos Santos 2.
- Latest
