Ross hari sa slam dunk, Irving maoy 3-point king

CEBU, Philippines - Sayo ning semanaha, mitug-an si Terrence Ross ngadto sa Ball Don't Lie nga nagtuo siyang aduna siya'y ikahatag nga surpresa ngadto sa katawhan nga mosaksi sa All-Star Saturday Night ug wala siya magtuo nga nahibawo na ang katawhan nga duna siya'y abilidad sa paghimo niini.

Si Ross, ang rookie sa Toronto Raptors maoy midaug sa 2013 Sprite Slam Dunk Contest sa usa ka makapakurat nga abilidad didto sa Toyota Center sa Houston, Texas.

"This feels unbelievable," matod pa ni Ross samtang nagkupot sa tropeyo human iyang gipalagpot ang 2012 champion nga si Jeremy Evans sa Utah Jazz atol sa championship round.

Nakadawat si Ross og 58 porsiyento nga fan vote alang sa final round kung itandi kang Evans nga nakadawat lang og 42 porsiyento.

Napuhalan sab ni Ross ang mas paboritong mga dunk contestants nga silang 2007 champion ug 2008 runner-up Gerald Green sa Indiana Pacers ug ang legendary dunker nga si James White sa New York Knicks aron moabante ngadto sa final round nga nagrepresentar sa Eastern Conference.

Sa iyang bahin, nagkanayon si Evans nga daw sa iyang paminaw nga dili siya angayan isip usa ka defending champion sa maong event ug nalupig siya sa point guard sa Los Angeles Clippers nga si Eric Bledsoe ug sa power forward sa Denver Nuggets nga si Kenneth Faried nga maoy mi-represent sa  West apan igo lang naka-angkon sa ikaduhang pwesto.

Maanindot ug mabulokon kaayo ang pagbukas sa maong event tungod kay maayo ang buena mano ni Green nga gitabangan sa iyang teammate sa Pacers nga si Lance Stephenson.

Samtang diha sa likod ni Green si Stephenson, midagan ang nauwahi didto sa baseline padung sa basket ug mi-itsa sa bola sa kilid sa backboard ug gisawo kini ni Green ug dayong himo'g reverse double-pump jam sa unang pagsuway nga susama sa iyang unang dunk niadtong 2007 contest dihang gitabangan sab siya sa iya kanhing teammate sa Boston Celtics nga si Paul Pierce.

Ang maong dunk nakapahugyaw sa katawhan ug naka-ani og perfect 50 gikan sa mga panel of judges  nga naglakip sa kanhi Houston Rockets coach Rudy Tomjanovich ug kanhi Rockets stars nga silang Hakeem Olajuwon, Yao Ming, Clyde Drexler ug Hakeem Olajuwon.

Ang East nakadawat og dugang 10 puntos sa overall tally tali sa East vs. West competition for charity hinungdan nga nakakuha sila'g perfect score.

Sa laing bahin, si Kryie Irving, ang sensational point guard sa Cleveland Cavaliers maoy bag-ong kampyon sa 3-point shootout nga kanhi gihuptan sa napiang nga si Kevin Love sa Minnesota Timberwolves.

Nahimo siyang kampiyon human siya mo-iskor og 23 puntos atol sa final round.

Daw wala magpakita og diyutay'ng gamay nga kulba si Irving kinsa maoy bag-ong kampyon sa 3-point shootout nga gipaluyohan sa Foot Locker.

Wala gyud mailado si Irving isip usa ka three-point shooter bisan pa sa iyang 41 porsiyento nga average gikan sa three-point arc. Hinoon, nakahimo lang gihapon siya'g pasulod og duha ka triples matag duwa karon nga season.

Sa iyang ikaduhang season sa NBA, nakahimo na siya'g 42 porsiyento gikan sa maong teritoryo.

Iyang gilupig si Matt Bonner sa San Antonio Spurs atol sa final round ug maayo kaayo ang stroke nga gipakita ni Irving nga daw wala kaayo mangusog alang sa follow-through ug mihatag og bug-at nga presyur ngadto kang Bonner.

Dili kadto taghap alang kang Irving kay daan na siyang naka-iskor og 18 puntos sa first round ug wala mausab ang iyang tirada atol sa championship round.

Usa lang ka tirada maoy iyang sipyat nga gilugwa gikan sa rim sa ikaduhang rack nga sayon ra unta alang kaniya nga mohakot og 29 o di ba hinoon 30 puntos.   (BANAT SPORT)