Nietes andam na makigbinukbukay

CEBU, Philippines -  Gipasalig si WBO junior flyweight champion Donnie 'Ahas' Nietes (31-1, 17KOs) nga aduna siya'y igong kusog bisan pa og molungtad ngadto sa 12 rounds

ang away niya batok ni Mexican champion Moises Fuentes (16-1, 8KOs) sa main event sa "Pinoy Pride XVIII: World

Champion vs. World Champion" sa Marso 2 didto sa Waterfront Cebu City Hotel and Casino.

 Kini ang tubag ni Nietes human usab sa pamahayag sa kampo ni Fuentes nga maluya na siya sa uwahing bahin

sa iyang mga away.

 "Kompiyansa ko sa akong hangin, mangita ko og knockout pero salig pud ko sa akong stamina kun ugaling

moabot sa 12 rounds ang away," matud pa ni Nietes atol sa press conference kagahapon didto sa St. Mark Hotel sa

Queen's Road Redemptorist Plaza, ning siyudad.

 Si Edmund Villamor, ang trainer ni Nietes miingon nga si Fuentes ang seguradong maluya tungod sa ilang

gameplan.

 "Kita mi sa iyang mga past nga away ug na-knockdown na siya, usa ra gyud among bantayan ni Fuentes kana

mao ang iyang straight," matud pa ni Villamor.

 Sa supporting bout, usa ka lisud nga tahas ang atubangon ni undefeated super bantamweight  Genesis 'Azukal'

Servania  (19-0, 6KOs)  kay ang iyang  harungon  ang Indonesian veteran nga si Angky 'Time Bomb' Angkota (26-8,

14KOs).

 Si  Angkota maoy bugtong boksidor nga nakapilde ni Nietes pinaagi sa "split decision" niadtong  2004 didto sa

Indonesia.

 Laing ALA fighter nga moaway batok sa langyaw nga  boksidor mao si Jimrex 'Executioner' Jaca (36-6,

20KOs) batok sa kanhi Muay Thai champion nga si Rachamongkol Sor Pleonchit (13-4, 5KOs) sa Thailand.  (BANAT NEWS)