Gikan sa yuta, Pingoy molupad na?

CEBU, Philippines - Nagkaduol na ang kamatuoran nga mobalhin si Jerie Marion Pingoy gikan sa Far Eastern University (FEU) ngadto na sa Ateneo de Manila University (ADMU).

Gikan sa yuta isip Baby Tamaraw, andam nang molupad si Pingoy isip usa ka Blue Eagle sa UAAP kung motungtong na siya sa kolehiyo diin adunay dakung posibilidad nga mutapon siya sa Ateneo.

Niadtong Disyembre dihang mipauli makadali si Pingoy o si Koko atol sa Christmas vacation, ako siyang gipangutana kabahin niini apan lihay kaayo ang iyang mga tinubagan ug kadaghanan sa iyang tubag "no comment ko ana."

Mas maayo man gyud unta og gikan gyud sa baba ni Koko ang makuha natong tubag apan karon daw nagkaduol na gyud ang posibilidad nga mobalhinay na siya ngadto sa Ateneo.

Gani ako pang mahinumdoman ang pangagpas sa atong higala diha sa PLDT nga si Paul Maninang nga ang kampo sa Ateneo daan nang naghuwat kang Koko human sa iyang high school season sa FEU.

Atol sa Holy Mass niadtong Press Freedom Week didto sa SM Trade Hall,  nagkita kami ni Maninang duol sa ilang gilingkoran kay usa man sila sa sponsors. Usa sa among gihisgutan mao ang career ni Koko didto sa FEU ug dayag na lang nalakip sa among estorya ang iyang amahan nga si Jerry Pingoy nga usa sab ka inilang basketball player kanhi sa amateur ug sa professional leagues.

Ang labing bug-at nga punto nga gitumbok ni Maninang nganong mas labaw pa sa 100 porsiyento nga mobiya si Koko sa FEU tungod kay si Jerrypings kanhi empleyado sa PLDT nga gipanag-iya ni business tycoon Manuel V. Pangilinan kinsa mao sab ang sports patron sa Ateneo.

Si Koko, ang kanhi produkto sa University of Cebu (UC) Junior Webmasters sa SBP-Pasarelle ug nakaduwa og duha ka tuig sa Cebu Schools Athletic Foundation, Inc. (CESAFI), dali kaayong mikulit og ngan didto sa UAAP dihang nahimo siyang UAAP juniors MVP sulod sa duha ka tuig niadtong Season 74 ug Season 75 (2011-2012) diin nag-average siya'g 21 puntos, 4.2 rebounds, 5.1 assists ug 2.1 steals.

Matod pa ni Ryan Betia, ang kanhi coaching staff sa University of San Carlos (USC) Warriors kinsa sakop na karon sa FEU coaching staff, mibutyag dinhi sa SPORTSgab nga dili lang diay  si Koko maoy Sugboanon nga taga FEU nga nahimong MVP tungod kay hasta ang MVP sa FEU Lady Tamaraws nga si Allana Lim gikan sab sa Cebu.

Ubos sa pagtimon ni Lim mikulit og 16-0 sweep ang Lady Teams sa UAAP diin nag-average siya'g 19.7, 9.2 rebounds ug mikulit og career-high 45 puntos atol sa ilang sangka batok sa University of the East (UE) Lady Warriors.

Si Lim gikan sa University of Cebu (UC) Lady Webmasters ug mibalhin sa FEU dihang na-disband ang CESAFI women's tournament tungod sa kakuwang sa team diin upat ka seasons nga upat lang sila ka teams ang kanunay magsangka nga mao ang perennial champion UC, USC Lady Warriors, USJR Lady Jaguars ug CIT Lady Wildcats.

Ang kanhi USC Baby Warrior nga si Joel Christian Lee Yu nga taga Sibonga, Cebu tua sab karon sa FEU matod pa ni Betia.

Ang head coach karon sa FEU Tamaraws mao na si Nash Racela ug ang mga sakop sa coaching staff naglakip sab kanilang Gilbert Lao ug Johnny Abarrientos samtang ang consultant mao si coach Bert Flores.

MISCELLANEOUS. Advance birthday greetings to Cyndee Larae Gonzales who turns 11 years old on February 6. Also advance birthday greetings to Mrs. Sonia Medalle of barangay Punta Princesa who is turning 62 years old on February 7.