Pilipinas daog batok Syria sa Davis Cup
CEBU, Philippines - Nakuha na gyud sa Team Philippines ang labing una nilang daog sa Asia/Oceania Zone Group 2 human nila gipukan ang Syria sa Davis Cup niadtong miaging gabii didto sa Plantation Bay Resort and Spa, Lapu-lapu City.
Human serohi sa Pilipinas ang Syria sa unang adlaw sa torneyo gikan sa paningkamot nila ni Johnny Arcilla ug Ruben Gonzales sa singles events, milampos pag-usab ang mga Pinoy sa doubles category.
Sila si Gonzales ug Huey mipilde nila ni Isaam Haithham Taweel ug Marc Abdelnour, 6-0, 6-3, 2-6, 6-2 aron mahingpit ang kadaugan sa Pilipinas.
Kini ang ikatulong kampaniya sa Team Pilipinas sa Davis Cup nga gipahigayun sa Lapu-Lapu ug human sila mapilde sa Japan ug Syria sa milabay'ng mga tuig, nagmaya sila tungod kay naangkon na gyud nila ang idlas nga kadaugan.
Sa maong kadaugan batok sa Syria, ang Pilipinas moabante sa second round sa Abril 5 ning tuiga diin posible nilang ikasangka ang Thailand dinhi gihapon sa Pilipinas.
- Latest
