Petron midemolis sa M. Lhuillier

CEBU, Philippines -  Balanse nga opensa ang gipakita sa Petron Blaze Boosters aron mademolis ang M. Lhuillier Kwarta Padala-Cebu Niños, 94-68 alang sa ilang ikaduhang sunod-sunod nga daog sa 2013 Sinulog Cup basketball tournament kagabii didto sa Cebu Coliseum.

 Gumikan niini, daku ang kahigayonan sa Petron nga mokampiyon ning tulo ka adlaw nga torneyo. Magdepende usab kini sa resulta sa sangka tali sa Alaska Aces ug Barangay Ginebra San Miguel nga padayong nagduwa ning pagsuwat.

 Ang kanhi NBA player nga si Renaldo Balkman, kinsa maoy import sa Petron miladlad sa iyang tinagoang abilidad aron pangulohan ang kadaugan pinaagi sa iyang game-high 23 puntos.

 Naglabaw unta og dos puntos ang M.Lhuillier sa first period sa iskor nga  24-22, apan mao ra kadto ang maayong labok nga ilang napakita kay ang Petron mipasiugda og sunod-sunod nga rally aron moposte 54-44 nga bentaha sa nahabiling  7:58  sa   third  quarter.

 Sukad niadto, kontrolado  sa Petron   ang  duwa   gani giinat pa  ang ilang labaw ngadto sa 21 puntos sa iskor nga 83-72  sa   katapusang 7:32 sa duwa.

 Lig-on usab nga depensa ang gipatuman sa Petron ilabi na ngadto sa sinaligang scorer sa Cebu Niños nga si Ben Mbala, kinsa igo lang nakahimo og singko puntos sa tibuok second half.

 Gawas ni Balkman, laing miiskor og double-digit alang sa Petron mao sila si Alex Cabagnot nga adunay 14 puntos ug Cebuano  Junemar   Fajardo   ug Dorian Peña nga  adunay 11 ug 10  puntos  matag  usa.

 Ang M.Lhuillier nga wala pa katilaw og daog sa ilang duha ka duwa gipangulohan ni Mbala nga miposa og 17 puntos, gisundan ni Abby Santos nga adunay 12 puntos, samtang si Mark Magsumbol mipunit lang og siyete puntos.

PUNTOS MATAG USA

 Petron (94) - Balkman 23, Cabagnot 14, Fajardo 11, Peña 10, Washington 8, Lanete 6, Lutz 6, Miranda 6, Tubid 6, Santos 2, Faundo 2

 M. Lhuillier (68) - Mbala 17, Santos 12, Magsumbol 7, Rodriguez 7, Saguindel 6, Saladaga 5, Heruela 4, Armecin 4