Alaska nakaipsot sa M. Lhuillier
CEBU, Philippines - Gipatapsingan sa Alaska Aces ang M. Lhuillier Kwarta Padala-Cebu Niños, 83-81 aron moposte og daog sa pagsugod sa 2013 Sinulog Cup kagabii didto sa Cebu Coliseum.
Sikit ang duwa sa first half diin nagbinayluay ang duha ka kampo og mga puntos nga miresulta sa panagtabla, 34-all.
Apan misilaob ang opensa sa Alaska sa third period human sa ilang 16-8 rally sa pagpangulo ni rookie sensation Calvin Abueva aron moposte og siyete puntos nga labaw sa iskor nga 56-49 sa nahabiling 4:09 sa maong kuwarter.
Padayong gihuptan sa Alaska ang momentum sa final period nga gisugdan sa tulo ka sunod-sunod nga jumper ni Dondon Hontiveros aron inaton ang labaw ngadto sa nuybe puntos, 68-59 sa katapusang 7:23 sa duwa.
Daw nakuha na sa Alaska ang maong duwa, apan wala damha nga kalit lang mi-rally ang Niños ubos sa mga paningkamot ni Cameroonian Ben Mbala ug pointguard Bryan Heruela aron pahakan ang labaw, 79-82, sa nahibiling 25 segundos sa duwa.
Human mapasud ni Casio ang usa sa iyang freethrows, mihimo og usa ka lay-up ug nakakubit pa kini og foul.
Apan misipyat ang iyang usa ka freethrow ug nakuha usab sa Niños ang offensive rebounds, apan nakahimo sila'g turn-over human nakatunob si Stephen Padilla sa linya hinungdan nga gitawgan siya og ‘out-of-bounce’ sa katapusang dos segundos sa duwa hinungdan sa ilang kapildihan.
Ang 6-foot-9 nga si Dozier maoy nangu sa Alaska pinaagi sa iyang 21 puntos, samtang si Abueva miiskor og 18 puntos, samtang si Hontiveros miamot og otso puntos.
Topscorer sa Niños mao si Mbala, kinsa mibahog og 23 puntos, gisundan nilang Heruela ug Mark Magsumbol nga adunay 15 puntos matag usa.
Ang Alaska moharong sa Ginebra San Miguel sa main game karong adlawa sa alas-7 sa gabii, human sa duwa tali sa Niños ug Petron Blaze Boosters sa opening game sa alas-5 sa hapon.
- Latest