Fil-Am fighter napakyas

Wa gi-swerte ang Fil-American Mixed Martial Arts (MMA) fighter nga si John Dodson human sa pagsakmit sa Ultimate Fighting Championship (UFC) flyweight title batok ni Demetrious Johnson.

 Si Dodson miiskor og tulo ka knockdown, apan dili kini igo aron mapilde ang mas agresibo nga si Johnson atol sa main event sa UFC on FX didto sa Chicago. (LPM)

Talk N’ Text maniid sa import

 Panid-an una sa coaching staff sa Talk N’ Text Tropang Texters ang ilang 6-foot-11 import nga si Keith Benson aron masuta kun haom ba kini sa ilang koponan.

 Ang kanhi player sa Golden State Warriors maoy moduwa sa opening game sa Texters, apan andam sila nga ibalik ang kanhi nila import nga si Donelle Harvey kun bati ang ipakita ni Benson. (LPM)

Lumacad gikulata didto sa Mexico

 Nakahiagum og ngil-ad nga kapildehan ang Filipino boxer nga si Fernando Lumacad sa iyang pagpanung didto sa Mexico kagahapon.

 Ang 26-anyos nga si Lumacad gi-knockout sa first round sa Mexican super flyweight nga si Felipe Orucuta. (LPM)

Rigondeaux mibatig kabalaka

 Wa mahimutang si Cuban boxing champion Guillermo Rigondeaux human nagkahayag karon ang posibilidad sa usa ka Nonito Donaire-Abner Mares showdown sa Abril.

 Si Rigondeaux maoy numero unong kandidato aron moaway ni WBO super bantamweight king Donaire, apan posible nga maunhan pa siya sa Mexican superstar nga si Mares. (LPM)